龍眼花的芳味 【原版】
仁武國小 賴羿潔
四月時 春風微微
吹來一陣一陣龍眼花開的芳味
吹來一个一个欲收成的好消息
這款芳味這款氛圍
引阮想起
灶跤櫥仔頂彼罐阿母舊年買的龍眼蜜
拍開鼻啊鼻
煞親像拍開阮猶擱細漢的記持
一个熱天的下埔時
阮佮阿母心花開
坐惦客廳的膨椅
一人一杯蜜茶涼 ki ki
一人一嘴lim了透心脾
母仔囝的感情嘛蜜蜜閣甜甜
彼款形影彼款滋味
雖然經過五、六年
每一擺來到龍眼花開的時
若鼻著龍眼花的芳味
阮就想欲偎佇阿母的身軀邊
永遠嘛無想欲分開
龍眼花ê芳味 【漢羅用字修改版】
四月時 春風微微
吹來一tsūn一tsūn龍眼花開ê芳味
吹來一个一个欲收成ê好消息
Tsit款芳味tsit款氛圍
引阮想起
灶跤櫥仔頂hit罐阿母舊年買ê龍眼蜜
Phah開鼻啊鼻
suah親像拍開阮iáu koh細漢ê記持
一个熱天ê下晡時
阮佮阿母心花開
坐踮客廳ê膨椅
一人一杯蜜茶涼 ki-ki
一人一喙lim了透心脾
母仔囝ê感情mā蜜蜜閣甜甜
Hit款形影hit款滋味
雖然經過五、六年
每一擺來到龍眼花開ê時
若鼻tio̍h龍眼花ê芳味
阮就想beh偎tī阿母ê身軀邊
永遠mā無想beh分開
沒有留言:
張貼留言