鄭清和
六月廿八﹙2025.07.22﹚
媽媽的頭旬選佇廿六的下晡三點，按道教的儀式進行，道士𤆬阮按無煙徛靈區共媽媽的靈引來和平堂二十二號。道士唸我聽無的寶懺，分做三个時段，每一个時段大約三十分鐘。
阮逐家攑香坐咧，道士講伊若拜，阮就綴咧拜。我的年紀真正有矣，第一个時段結束欲徛起來歇睏的時，感覺人強欲踅圓箍仔，好佳哉，大孫頂尾囝的阮後生坐佇我的邊仔，趕緊共我扶咧，才無去予跋倒。研究癌症的阮後生，加減對醫學有捌一寡，伊講我可能心臟有問題，血送袂起去腦，我看，媽媽的後事若是辦好，我應該愛來去病院檢查看覓。
頭旬完成，離暗時入木的時間猶久，阮逐家就圍佇桌仔邊摺蓮花。葬儀社的秘書寀綸小姐，一步一步寬寬仔教阮，逐家足認真學，無偌久就摺一堆蓮花金出來，欲來燒予媽媽。
我是大囝，媽媽的大體捒出來的時，由我確認是毋是阮媽媽。崁佇媽媽面頂的布掀開，我隨頕頭講是。化妝師真厲害，共媽媽妝娗甲有夠媠的。本底就白肉底的媽媽，佇白色光源的下跤看起來閣更加較白矣。媽媽目睭瞌瞌，慈祥的面模仔，睏甲足安詳的。
媽媽人中彼粒痣，雖然化妝師有想欲共掩崁起來，毋閣佇我目中猶原顯頭。定定媽媽若想著，攏會講起彼年伊十八歲，擔山菝仔去關廟市仔賣，有一个相命仙喊伊看有欲相一个仔命參考一下無？媽媽無插伊，因為一擔菝仔賣無三箍銀，哪有錢通算命呢？不而過相命仙喊伊稍停一下，講欲共伊算一下相送的，免錢。媽媽頓蹬幾秒鐘，相命仙斷講媽媽人中彼粒痣會予伊連生兩个查埔囝。人講「相命無褒，食水都無。」，媽媽想講相命仔喙糊瘰瘰，當做馬耳東風，聽聽仔就好，無共相信。想袂到閣有影應驗呢！媽媽生我了，第二胎生阮小弟，真正相連紲生兩个查埔囝，再後才閣生阮小妹。
寀綸代先有交代阮傳一寡錢，用紅包橐仔橐咧，伊共紅包橐仔意思性囥佇媽媽的正手，然後才閣提予我，講遐就是媽媽欲留予阮的手尾錢。阮牽的有特別算好勢，分到媽媽的乾仔孫，有人有份，大細漢攏分兩千箍。寀綸講愛囥予好勢，等對年以後才去買需要的、有紀念性的物件。提著阮牽的分予我的媽媽的手尾錢，我的目箍含著珠淚，媽媽嫁來阮鄭家，做牛做馬，四十五歲就失去翁婿，啥物福嘛無享受著，伊走矣猶閣驚我無飯通食，日子過袂落去，留手尾錢欲予我。共媽媽予我的手尾錢袋落去我的橐袋仔，我無想欲買啥物紀念品，我欲共紅包橐仔和錢囥咧，這就是上好的紀念品矣。
廿七早起，先去龍崎戶政共媽媽辦除戶的手續，因為紲落去的一寡仔申報，攏愛用著除戶的戶籍謄本。媽媽肩胛頭的重擔，真真正正放下矣，自阮阿爸過身交予伊的戶長，伊成做一家之主，夯這个枷總共四十八冬，終於會當停喘歇睏。戶政人員講我是大囝，戶長換我做。
十點左右，我的姪仔淵哲載我去繳納骨堂的費用，了後阮做伙去殯儀館共媽媽燒香。有一个立委連絡講欲來共媽媽致禮，毋閣阮等無，有可能阮來了較晏，伊看無家屬，共一箱水囥咧就先離開矣。
下晡去歸仁戶政，共我的戶口遷出來歸仁，我早起才做的龍崎祖厝的戶長，就取銷矣。阮牽的半滾耍笑，半共我黜臭：「你才做半日的戶長爾！」。原本歸仁的戶口蹛阮牽的和兩个囡仔，阮牽的是戶長，查某囝嫁，遷去高雄，後生娶，遷去臺北；阮牽的講戶長這个枷伊夯足久矣，欲換我做，所以我正式變做歸仁人，自我介紹的時，以前我講我蹛歸仁，以後我會使講我「開銀行」﹙歸仁人﹚。
三旬講是查某囝旬，廿八這工阮小妹來，有倩一陣牽亡歌仔團，伊講媽媽在生愛看牽亡歌團表演，所以倩一陣欲跳予媽媽看。
阮阿爸往生的時，有幾个親情合倩一陣牽亡歌仔，裝做孝女的女團員，吼聲悽慘，媽媽綴咧目屎𥍉𥍉流。這擺看著女團員那爬那吼，媽媽斯當年吼聲淒涼的影像浮佇眼前，我喉滇，擋袂牢，目屎綴咧輾落來。
節氣佇今仔日來到大暑，並毋是規工熱甲走無路去覕的天氣，有時仔會落雨，彼當陣就較無遐爾熱，毋閣無落雨的時，規身軀黏黐黐，足漚鬱熱的。
六月三十﹙2025.07.24﹚
按照古禮俗來講，每十工算一旬，四十九工後的第十工，也就是過身第五十九工號做第一旬，第六十九工是第二旬，來到第九十九工的時，因為隔工就滿一百工，做旬就和百日祭祀儀式合做伙。
這馬是工業社會，根本無法度照起工做旬，所以修改做「做七」，佇往生者離開的四十九工內，每七工誦經作法一擺，第一个七工號做頭七，由孝男負責，第二个七工叫做二七，由新婦負責，按照順序，第七个七工號做七七，也叫滿七，由孝男負責。毋過已經誠少人做到四十九工，嘛共「做七」和「做旬」濫濫做伙，分袂清楚。
道士共阮媽媽的後事縮短到十一工爾，講紲落去是閏六月，逐家較無愛佇閏六月辦事。就按呢，伊開予阮的做旬日課表是安排六月廿六做頭旬﹙首七﹚、第九工六月廿八做三旬﹙查某囝旬﹚、第十工六月廿九做尾旬﹙圓滿旬﹚。
六月廿九的早起時九點開始做尾旬。因為阮小弟講欲做司公予媽媽看，雖然媽媽生前有共我講伊毋看司公，但是交代藥懺一定愛做，因為伊這世人食足濟的藥。兄弟仔佇咧參詳的時，阮小弟體會媽媽較會體諒阮，驚伊的後事會開傷濟，才會按呢表示。阮小弟講阮阿爸過住的時，阮兜當散赤，不而過媽媽堅持愛共阮阿爸做司公，按遮會當看出媽媽在意做司公這个儀式。
司公按一點做到四點半，最後阮全家跪佇媽媽的靈位前跋桮，本底道士共阮講可能愛跋足久，想袂到足順的，道士問的每一个問題，我一跋，攏隨應象桮，道士感覺不可思議，我共講阮媽媽的個性大路。媽媽誠歡喜，一切圓滿！我上煩惱的藥懺，伊嘛應講伊攏無病無疼矣。
下晡五點，阮去燒庫錢、紙厝，一棟現代式啥物攏齊備的三層樓欲予媽媽蹛，所有子孫仔加加咧，庫錢攏總有十億欲予媽媽開。牽索仔佇咧圍庫錢驚孤魂野鬼來搶劫的時，我咧想，佇遐媽媽應該會有一个起碼的生活通過矣。
六月的上尾工，三十是媽媽的告別式。我干焦通知阮後生的丈人爸、阮查某囝的大官，和阮牽的後頭厝爾。當然，阮媽媽的外家是一定愛通知的。
古早時代，佇喪事這件代誌，後頭厝是一个重要的角色，往生的時，家屬愛親身去向外家跪咧稟告，入木的時，佇欲封棺的進前，愛予外家探棺，看有無正常的死亡無。有時遇到和外家的關係無好，外家會刁工和你夯硬篙，無愛予你封棺，彼陣代誌就大條矣，愛央請地方的頭人出來調解。
媽媽的外家派阮阿舅的大漢囝宗焜來，伊吼甲袂慼氣，跪拜的時，頭磕佇塗跤，發出的響聲，傳入我的耳空，我看在眼內，感動佇心內，目屎含佇目箍。是按怎宗焜會遮呢真性情呢？因為阮媽媽和阿爸足照顧𪜶一家人，我的記持當中，有一擺我看著阮阿爸咧吼，吼講：「阮舅仔哪會遮爾散呢？」
因為無愛奢颺，所以長輩無稟告，親情無告知，朋友無知會，致使參加公祭的人無幾个，顛倒上濟的是民意代表。告別會中，我要求司儀予我代表家屬講一寡媽媽的故事，我傷厚話，喋袂煞，阮牽的共我掰幾若遍手，暗示我愛踏擋矣。
下晡一點，送媽媽的大厝去火葬場，阮叫媽媽看著火愛緊走。三點半媽媽化做無成骨的細塊幼骨仔，阮一人夾一塊囥入去媽媽的金斗甕仔，其他由化骨師幫忙倒入去。
載著媽媽的骨烌，阮趕赴歸仁納骨塔，共媽媽的金斗甕仔囥起去阮事先幫伊選的塔位。共媽媽合掌三拜了後，我縛絚絚的心規个敨放落來，因為媽媽的後事圓滿矣。
閏六月初三﹙2025.07.27﹚
這幾工有三个風颱佇咱臺灣的四周圍形成，我足煩惱會對媽媽的後事造成無方便。根據氣象報告，范斯高﹙Francisco﹚佇閏六月初一減弱做熱帶性低氣壓；竹節草﹙Co-May﹚會對呂宋島去；另外有一个號做柯羅莎﹙Krosa﹚的會對日本去。
風無入來，毋過𤆬來雨，臺南殯儀館遮無大雨，不而過三不五時會噴幾點矣。我足驚摔大雨影響著媽媽的出山，心肝頭若吊一塊千萬斤重的大石頭咧！
好佳哉！六月三十告別式彼工無雨，啥人知氣溫夯足懸，我穿麻衫送媽媽去到火葬場的時，規身軀汗，內衫和外衫攏澹糊糊，但是流汗總是比沃雨較好，敢毋是呢？
有一條台語囡仔歌按呢唱：「歹心烏腸肚，欲死初一、十五，欲埋風佮雨，欲抾骨揣無墓。」，看來，媽媽真正是好心的人，伊的告別式無風無搖，無雨無滴。
今年的六月雙閏，俗語講：「三年一閏，好歹照輪。」，每二、三年會有一个閏月，今年的閏月輪佇六月。閏六月初一這工，我和扞數的阮牽的共媽媽喪葬的開支做一个結算，用道教的儀式兼做司公，竟然超過六十萬，我掣一趒，想袂到遮爾濟。有一个厝邊蹛佇安寧病房，家屬問葬儀社行情，講較經濟的方式愛差不多十萬箍伸勼，若閣再加上金斗甕仔和塔位，極加是二十萬箍。
數算了，我恬恬坐佇冊房的桌仔前，想起按六月二十媽媽往生到六月三十進塔，頭尾這十一工是按怎過的，除了悲傷、傷心以外，體力的忝頭強欲接載袂牢，敢若予人囥入去燖煨內底佇咧𤉙熬，規个人袂輸去予煨爛去，規身軀𤺪𩛩𩛩。
我想起西元前四百七十九年的四月十一日孔子公過身的代誌，弟子為伊結廬守墓三年，彼个做生理號收端木子夏的弟子，閣加守三年；後來官員守喪叫做「丁憂」，嘛是三年，毋過實際上是二十七個月，這段期間無做官、無嫁娶、無赴宴、無應考。看起來足有孝，不而過佇這馬這个資訊社會根本無可能按呢做。
閏六月初二去誠久沒去的園仔，草仔發甲足懸，尤其是四季檨仔欉遐，樹跤的草已經超過跤頭趺，有一寡仔開始開花矣。因為這段期間，三不五時就會落一下仔雨，天公伯仔敢若和我仝款，攏咧為阮媽媽的往生毋甘，我若想著，會滴幾滴仔目屎，天公伯若想著，會落幾滴雨，所以園仔的水溝猶閣積水，無法度做工課，我只好去薅籬笆靠打馬膠路的草，阮牽的去割番薯葉和挽菝仔。
隔壁園仔的羅教授來a̋i-sat-tsuh ，問講哪會遐爾久無來園仔，是毋是出國去𨑨迌矣，我共伊講是媽媽百歲年老做仙去矣。羅教授提醒我，講阮彼欉龍眼傷過頭熟，落規塗跤，伊有看著鳥仔來喙。我共彼欉福眼規欉遏落來，送一把予羅教授，賰的按算分農友阿雲仔和厝邊頭尾。
有一句農諺：「立秋，龍眼臭狗溜。」，好佳哉！有羅教授的鬥斟酌，若無，遮仔龍眼若無遏，囥到立秋，毋但蒂頭會包材，食起來嘛會臭狗羶，有人講是杜蚓仔羶。
閏六月初三的早起，天公伯仔和我相仝，猶原行袂出來，原在咧毋甘阮媽媽的無去。十點雨停，好天，出大日頭；過晝，天陰但是漚翕，褪腹裼嘛猶咧流汗。
園仔無愛去矣，因為水溝仔水猶未焦。我坐佇電腦頭前，拍夏天「穀雨」彼篇稿的字。
閏六月初七﹙2025.07.31﹚
雨落袂煞，閏六月初四到初七攏落雨。阮遮是無災情，毋過拍「無米樂」這塊影片的崑濱伯𪜶菁寮的街路卻是淹水淹到咱人的腰。電視播出的影片是蹛街仔住戶的狀況，我咧臆，田仔應該淹閣較忝，明年無崑濱伯的冠軍米通食矣。
相連紲規半個月落雨，園仔猶積水，袂當創啥物，只好學客家人的做法，共我無時間讀的資料提出來讀。有一擺我去水萍塭公園的臺南市客家文化會館，我毋是客人，但是對門口彼副聯對卻是足佮意的：
一等人忠臣孝子
兩件事讀書耕田
我欣賞忠臣，我敬佩孝子；有代誌、有工課通做，就去做；無議量、無頭路，就讀冊抑是作穡。對工場退休了後，我那教冊、寫作，那作田，過的就是客家人所重視的兩件事--讀書、耕田。
迒過七十歲這个戶橂以後，我讀的冊除了教大學生愛備課以外，我會使講攏讀台語的散文和小說，另外，我加減看一寡仔老歲人愛按怎過人生賰落來的日子的冊。這站仔上熱門的就是介紹日本石井哲代阿媽的冊，冊名號做《102歲，一個人生活》，有翻做中文簡體字的版本，冊名叫做《不生銹的人生》，我想欲了解伊的人生觀，所以足認真共讀。
一九二○年出世佇廣島市的哲代阿媽，二十歲擔任小學老師，五十六歲退休了後就一直作穡。這本冊是記錄伊按一百歲到一百過二歲的日常，伊逐工除草、做柔軟操、寫感謝批，騎電動車去掃𪜶翁的墓，嘛寫日記。
哲代阿媽伊講人就像鋤頭仝款，無用會生鉎，這馬伊已經一百過三歲，記者問看伊欲按怎度過日後的人生，伊笑笑仔應：「只要『平安無事』就好，無啥物比平凡的度過每一工閣較好的代誌矣。」
退休了，我嘛是咧作穡，毋過我毋敢數想欲活到哲代阿媽的歲數，干焦欲學伊的人生態度--做一支袂生鉎的鋤頭。
閏六月初六，收著臺南市文化局寄來的冊，誠歡喜，這本《再來一杯米酒》是參加二○二四年臺南作家作品集徵選入選的短篇小說集，是大學時代寫的作品，原本已經拍字好勢，準備欲自費出版，誠拄好，佇網路眼著臺南市文化局的簡章，想講試看覓，看會「青盲貓咬著死貓鼠」抑是「青盲雞啄著蟲」未？想袂到「歹船拄著好港路」，竟然入選，歡喜甲𡳞脬強欲跋落塗。
總共寄來一百本冊，那摸著設計誠媠的冊皮，那鼻著油墨足顯的冊芳，我開始簽名寄予替我寫序的黃瑞田老師、吳東興記者、馬水金董事長，沿仔簽，沿仔感恩，明朝王邦畿彼首＜題畫呈梁觀＞的詩句，佇我的腦海浮起來：
大暑當時局蹐居，故人持畫索新書
溪邊最愛個亭子，置我其中便自如
佇大暑這个節氣，詩人蹛佇厝，因為熱翕，致使心情緊張，朋友梁觀提一幅畫來請伊題字；若是溪邊有一个涼亭仔，佇內底題字就較自在。這个情況有小可仔仝款，我佇大暑簽冊欲來送文友，毋過我毌免去溪邊的涼亭仔，共冷氣開開就足自在矣。
一直到閏六月初七，連紲兩工，臺中、南投攏做大水，災情誠嚴重。阮牽的敲電話去問彼个種臍橙的大學同學秀霞，看有損失無？伊回講𪜶的地勢較懸，無問題；毋過阮捌去食泡麵的彼間佇山頂，號做「石龍宮」的土地公廟，竟然因為樟平溪的溪水暴漲，淹到廟內來。
閏六月十一﹙2025.08.04﹚
媽媽過身了後，遺產愛交接，閏六月初八我和阮牽的去新化的國稅局辦手續。因為媽媽的遺產足單純的，干焦賰一屑仔現金爾，所以並無扣著遺產稅，手續兩三下手誠緊就辦好。
媽媽會無土地的遺產，是因為阿爸真早就過往，彼个時代的風俗是查某無咧分土地，所以媽媽和阮小妹攏拋棄。了後媽媽共手頭予阮兄弟隨人家己扞，伊輪火鬮，一個月佇我遮，一個月去阮小弟遐，綴阮生活，根本無去想欲買不動產。自伊蹛護理之家了後，阮共伊過年、生日、母親節等所收著的紅包，攏替伊寄佇郵局，另外，伊的彼條老農年金，逐個月匯入去農會，這就是伊的現金遺產。
阮兄弟仔有事先參詳，媽媽的現金將來會變做遺產，所以有加減領出來付伊蹛病院的醫藥費和看護費，因此，賰無偌濟，無去扣著遺產稅。雖然媽媽留予阮無幾箍銀，嘛無留不動產予阮，不而過伊留予阮點算袂了的愛，彼是阮報答未盡的養育之恩。媽媽的愛就是上珍貴、永遠開袂了的遺產，敢毋是呢？
有一句詼諧話：「母親節食龍蝦，父親節走甲無半个。」，好佳哉！阮兜無按呢生，我的情景無遐爾悲慘。嫁去佇高雄小港的查某囝和囝婿，佇閏六月初九轉來，講欲共我提早慶祝爸爸節，問看我有想欲去佗位。我第一想著的就是佇農曆五月十九開幕的「誠品生活臺南」，按看著新聞報導彼工開始，愛冊的我就數想揣一工欲來去行行咧。所以，阮車駛咧就出發。
阮先去默爾﹙More﹚這間義大利餐廳食義大利麵和披薩，因為父親節有人滾耍笑共講做「付清節」，所以食飽我就先去付錢。其實查某囝送我的喙鬚刀仔，伊佇網路買寄來，已經用一禮拜去矣。這逝欲來食好頓的，我就用彼支喙鬚刀仔攄甲足清氣的。𪜶送禮物，閣再來陪我先過父親節，我足感心的。
隨後，阮分開去踅冊店，各人看各人愛看的冊。牚懸十米的雙層冊牆，建築師蕭博文融入臺灣傳統「埕斗」的設計，雖然浪費袂少囥冊的空間，毋過彼號媠款、彼種氣氛，予我強欲行袂開跤。
有規劃臺灣文學專區，不而過臺灣文學的相關著作並無特別囥佇遮，攏和現代文學摻濫做伙，我僥規半晡才揣著幾本仔。結數的時，我買二本，一本是呂美親教授編的《台語現代散文選》，另外一本是知名台文全能的多產作家王羅蜜多的《詩王浪溜嗹》。
欲離開「誠品生活台南」的時，阮去Ｂonnie Ｓugar 手作甜點專賣店，蹛臺北無法度轉來的阮後生，有訂一个雞卵糕欲共我慶祝。因為中晝頓食傷飽，雞卵糕就當做暗頓，真好食呢！沐著指頭仔的，攏毋甘搐搐，閣用喙去共舐起來呢！
閏六月初十這工拄著禮拜，我共春天六个節氣的拍字稿校對好勢，揣六間雜誌社投稿出去。目前接受台語散文的雜誌、報社誠少，對寫台文的作者來講，實在是可憐代。
少年寫華語文章的時，會當投稿的報紙副刊、雜誌滿滿是，這馬報社一間一間停起來，雜誌一本一本收起來，會使投的賰無幾間，毋過大部分無接受台語的文章。好佳哉，有幾間台語的雜誌成立，但是月刊真少，其中八、九成是季刊，一篇文章投出去欲刊，一冬後是誠正常的代誌。有一个寫台文的文友激詼諧共我講：「拄仔破病，倒落去病床，共人生上尾一篇文章投出去，刊出來的時，人已經佇天堂矣！」，伊講了，阮兩个人攏笑甲反過去。
秋天連鞭欲來矣，夏天的文稿有照起工寫，毋閣半字嘛猶未拍，今仔日就按立夏開始，一字一字聊聊仔拍。拍字對七十外歲的老大人來講，實在是誠忝頭的穡頭，比攑鋤頭閣較艱苦。因為那拍那順紲修改文句，搪著無確定的字，愛閣查《教育部臺灣台語常用詞辭典》，所以，進度若龜佇咧趖，目睭花、目油流，拍一工，才拍完四月初八彼工，差不多一千五百字爾。
閏六月十三﹙2025.08.06﹚
因為入選二○二四年第十四屆臺南作家作品集的徵選，所以，昨昏參加臺南市文化局為阮舉辦的新冊發表會。
發表會選佇葉石濤文學紀念館，葉石濤先生是我崇拜的作家，我上愛伊彼句「臺南是一個適合人們作夢、幹活、戀愛、結婚、悠然過活的地方。」，我這世人攏綴這句話行，我少年的做夢、中年的食頭路佮結婚佇臺南，退休了後的悠然生活嘛佇臺南。
見著這擺做伙出冊的龔顯宗教授、周志仁老師、蔡錦德老師、陸昕慈老師，我供𪜶的冊提予𪜶簽名，徛踮佇𪜶的身邊看𪜶簽冊，我想袂到講我會當像這馬的少年仔，以「Fans」的名義，享受著請「Idol」簽名的歡喜。
發表會予每一个作者五分鐘紹介家己的冊。八十幾歲的龔顯宗教授，講伊欲閣再寫，寫到九十歲，伊予家己的計畫是欲閣再出十本冊，臺下的噗仔聲響連天。綴咧拍噗的當中，我咧想，若是親像龔教授彼般的企圖心，我猶有較臨二十冬通活，我愛閣寫二十本冊，想到遮，我的舌仔吐甲長躼埽，這是我從來毋捌想過的代誌，這若無二步七仔哪有可能？我敢有這號本等？
輪著我上台，我按國校升初中模擬考的作文刊佇玉峰文摘頂懸講起，紲落去講著高中佇南二中予李安導演的爸爸李昇校長，要求背國文課本逐篇文言文，致使增加我寫文章的能力的往事，一直講，講毋知通煞。主辦的怡婷佇聽眾席共我做暗號，我有看著，毋過喙停袂落來，繼績喋，喋袂煞癢。怡婷去請台下的阮牽的徛起來，伊正手的指頭仔比1囥佇喙，我知影無結束袂使矣，才有夠毋甘願收兵。
中晝，我請特別來共我捧場的長榮大學研究所的同學德宗𪜶翁仔某，佇忠義路的陶板屋食飯。德宗是大亞電線電纜的副總經理退休，伊的囡仔攏教育甲真好，大漢後生去國外學音樂，讀到博士，這馬佇臺灣的長笛界算上上腳的。
今仔日透早五點半就起床，趕第一幫上此的高鐵，去板橋和其他的評審會合，欲來去三峽的工廠審核改善活動。今年我猶原被聘任做「臺灣持續改善活動」的評審委員，自退休一直擔任這个工課到今。
坐高鐵有幾遍佇板橋遮落車，逐擺落車，彼首臺灣台語民謠「板橋查某」，就佇耳空邊響起，綴我一步一步行出車站：
火車火車吱吱叫，六點十分到板橋，板橋查某媠閣笑，
轉來去賣某來予伊招，來予伊招。
聽講這是新莊的查埔佇咧消遣板橋的藝妓的歌，早期原野三重唱常在佇電視節目內底唱。歌詞雖然誠簡單，毋過一直餾，一直餾，餾一下久，聽的人不知不覺就會有一種莫名的衝碰，想講「殘殘豆乾切五角」，規氣共家己的某賣賣的，來去予板橋查某招。
參我相閃身的女性，逐家攏笑微微，共斟酌看，逐家真正是媠噹噹呢！下晡阮按板橋坐高鐵去臺中看另外一間工廠，再一次欣賞著板橋查某的媠閣笑。我嘛想著國校阮彼一班彼个號做「秀連」後來改名「沛君」嫁來板橋的同學，斯當時，阮班有誠濟个查埔同學，綴黃西田的歌流浪到臺北，我想袂曉沛君這个查某囡仔哪有遮大的勇氣來臺北趁食，落尾嫁佇板橋呢？
