轉（tńg）來牛稠埔

 

 (ㄧ)姊(兄)妹仔情

                                                                                                                                                       吳     正     任

   今年節氣有較晏,莫怪!成个月前,我轉去山裡行一綴,明明著農曆倚(uá)5月底,連鞭著欲伐過6月矣!沿路看著,掛踮龍眼椏頂的龍眼,哪會猶閣赫爾細粒?準講今年一般的,花開甲蓊(茂),葩頭牢較厚,大葩頭,龍眼細粒像是該然,毋過,往冬這个時節,成熟度嘛欲有6~7分,抑著是咱前輩佇咧講的------”臭尿帔味矣”!挽一粒,剝開共看覓,龍眼hu̍t(核)嘛轉烏瞰,若拄著早花仔,這時已經有人at(摘)佇賣矣!

    有一站仔,心內的僥疑,鬱踮心肝頭,未得敨(tháu)!有一工,無疑悟,行到客廳酒櫃邊仔,掛一本超大本的曆日仔,停落跤步,想講共掀看覓咧,哇!原來今年農曆潤雙六!原本我佇擔心的------往冬,若到農曆七月初一,月頭拜好兄弟,供桌頂備辦的果子,家家戶戶,差不多攏有這味------龍眼,若照節氣共算來,離農曆七月初,猶閣有欲成个月的時間,按爾時到應該會赴市才著! 聽頂一層老輩講起,潤雙冬,無好比指,毋知有影否?

    閏雙六,月中,嫁佇”狗氤氳”的四姨,連紲敲幾仔通電話予二姊,連絡講,這站仔看佗時有閒,載阿母來”水吼仔” at(折)龍眼,伊閣一迭吩咐,一定愛載阿母作伙去,伊足久無看著三姊(指我阿母),尾仔,約好勢著踮頂禮拜六,下晡點半,二姊 uí白沙崙開車à經太爺à大湖à阿蓮à崗山頭à到”水吼仔”龍眼坪,一逝路遠lo – lo .來回上無嘛愛5～60公里,二姊因為腰脊骨各樣, tsûn年,遠路揣去到”萬丹病院”開刀手術,出院了後復健,到今tann,猶未復原,行路猶閣跛咧跛咧!身軀欲坐,欲倒,動作攏愛足細膩!嘛袂使捾重!遮種種,攏是驚去動著腰脊骨,伊勉強開車赴約,只要毋是愛食龍眼,因端是無愛tshik四姨佮阿母久無見面,姊妹之間的思念定掛踮心肝頭!何況,阿母今年已經98矣!抑四姨嘛有94矣!趁兩个人猶閣會行,耳空猶閣精光,目睭猶閣會清的時陣,若無揣時間見面,恐驚時間毋等人,見面ㄧ擺,著減ㄧ擺矣! 前幾冬,年中我向二姊提議,做伙去高雄探訪蹛院的二舅(彼冬二舅,百歲高壽)彼擺,拄著疫情結束猶無偌久!病院猶嚴格控制,親友欲探訪,規定誠嚴格!二姊載我佮阿母,去探訪二舅,二舅倒佇病床,阮干那會當踮院內的室外樓中花園空中視訊,由表兄踮床邊,轉述予二舅知,彼時陣,毋知二舅有感應否?彼擺,二衿嘛94矣!坐輪椅,猶知影人,看著阮,伊足歡喜!少年時陣,佮阿母兩个,兄嫂小姑誠好鬥陣,遺憾的是,疼痛伊小妹(阿母)對待外甥像家己後生查囝,照顧阮姊弟仔的二舅,踮百歲彼冬,福壽全歸;二衿嘛佇隔冬仙逝!

     事實上,我足重兄弟姊妹骨肉間的情份,替序大人設想,雖罔阿母袂提起,講伊會思念阮阿舅阿姨,毋過,做人序細的咱這輩,當該然,愛替設想……佇Tsûn(前)年年初,我著捌倩(雇)計程車,載阿母去路竹,看屘姨仔,事先有電話連絡姨丈,我欲𤆬(tshuā)阿母去伊兜𨑨迌;彼陣屘姨仔記持已經tāu　–　tāu仔失矣!有時清醒,有時愣(gang)!講予聽的代誌,初頭知,毋過,過3分鐘抑5分鐘,隨袂記得!彼遍,姨丈有共講三姊(指阿母)和我,欲來揣伊𨑨迌,阮一到位,姨丈共伊兜大門拍開,屘姨看著我,猶閣會記得,細漢我定佮阿母轉去“牛稠埔”外媽的兜,Soo-pai,伊對我的名猶記稠稠!隨叫一聲:正任!足親切的語調,彼兩字,過6-70冬,伊猶會記得!姨丈留阮踮伊兜食晝,屘姨一直欲挟菜囥阿母的碗內,阆赫(遐)久,無見面,屘姨已經失智,我坐踮阿母的邊仔,看in姊妹仔之間的互動,目眶攏強欲澹濕!會記得,屘姨猶袂失記持進前,三不五時,攏會騎oo-too-bái,買一寡物件,ui　路竹,騎來到岡山看阿母,兩个姊妹的感情有夠好!

    我會提起遮,愛講著”水吼仔”這片果子坪,事實上,是屘姨/姨丈的,因為事業大,加上其他原因,做袂去,只好委託親晟作,代起先,(十外冬前)委託二舅佮二衿,作一段誠長的時間,後來,因為in 年紀愈來愈濟,體力袂堪得,支載袂牢!才還姨丈家己作,阿母in兄(姊)妹之間,感情足好!我會記得,二舅,二衿代管理這片龍眼坪期間,若到龍眼大出(盛產)的時節,攏會通知阮載阿母來at龍眼;有一冬,二衿已經七十外歲矣!猶閣親身攑著挟仔,跁上龍眼欉,at龍眼予阮遮外姪載轉去分享.

    二舅佮二衿無閣承作這片龍眼坪了後,姨丈才另外央請表兄(四姨的後生)共承作,阮這幫載阿母來at龍眼,著是憑表小弟佮四姨的福,才有機會,姊妹仔攏九十外歲高壽,佇咱人六月,轉來後頭厝------“牛稠埔”的果子坪溫暖閣甜蜜的聚會……

(二).情繫<牛稠埔>

    接紲這段,欲來講我佮大崗山跤,這个細山村------“牛稠埔”的情緣:

遮ㄧ切愛 uí 我阿母講起,伊佇遮出世,大漢了後,嫁去”中寮山”西爿面,山跤ㄧ个細庄社------“水蛙潭”,Soo-pai.,從(tsīng)細漢,我阿母若欲轉去後頭厝,我ㄧ定攏綴有著逝(tsuā),會記得,屘姨仔作查某囡仔的時,踮這馬”牛稠埔新興路48號”客運車牌仔邊,開ㄧ間橄仔店,賣ㄧ寡仔庄跤人,三頓愛用的雜貨佮果子;我讀國校的時,逐擺若佮阿母轉去外媽兜,坐客運到牛稠埔,落車著先去揣屘姨,屘姨看阮來,知影我愛食弓蕉,隨著捾吊踮棧架頂頭,熟黃的弓蕉予阮食!屘姨結婚,我嘛綴序大人來予外公外媽請,何況,這門婚事,是屘姨的三姊夫(我多桑)共主意,加上二舅贊聲促成的!聽阿母講,初頭屘姨嫌姨丈生作低(kē),若兩个人徛作伙,低屘姨仔ㄧ粒頭,無四配!我多桑受日本教育,閣踮庄役場(鄉/鎮公所)食公家頭路,Soo-pai ,外公外媽對我多桑(in的第三囝婿)特別看重!姨丈讀建築的,彼个年代,台灣經濟當咧起勢,各所在營建業,建商推出建案,起販厝賣,一案攏起咧數十間,而且閣搶市,踏著時機,姨丈趁錢會使講若佇趁水咧!掠外,伊閣投資其他事業,論真講,阿母五个姊妹仔內底,屘姨仔嫁了上好!姨丈錢趁洘洘,蹛的厝體家己起,間隔闊,厝邊庭園閣圍牆仔,會使算是豪宅!厝起大抱,山園土地陸續蓄(hak),一世人食穿攏免煩惱!遮證明當初伊二兄佮伊三姊夫誠有遠見!古早人流傳一句話語”第三查某囝食命”,毋知有影否?遮愛問阮阿母才知,做為伊的大漢後生,我干那知影阮兜無作大穡,相對來講,阿母嫁予多桑,拆白來講,有比其他同娰仔較輕可,佇彼个年代,翁婿食公家頭路,踮庄裡,確實加誠受人尊重!何況,彼當陣,百性完租納稅種種,攏愛去到鄉公所納;抑村民攏會欲寄我多桑紮去公所代納;向時,村民較袂愛佮公家機關相交睬,想講離遠遠較穩當,毋過,阮庄著干那阮多桑佇鄉公所食頭路,無寄伊是欲寄誰(siáng)?

    翻頭來講,阮阿母細漢著生作躼跤躼手,少女時代,參加鄉運動會,攏排頭名,被推選去岡山郡參加走標,嘛是走第一!岡山郡欲閣推派伊去鳳山參加縣級比賽,無疑悟,被仝庄的選手檢舉,講阿母的年歲無夠,結果,選拔單位從而要求欲查”家記簿”,落尾真影是年歲不足,被取消資格!這是阿母uì少年到老,藏佇伊心肝底,無法度放袂記的遺憾!到今tann,若𤆬阿母出去𨑨迌,明明行路著已經愛人牵,兼托四跤柺,跤步才會在,毋過,90外歲的阿母,猶原好強,笑笑仔共阮應講:人伊做囡仔的時,是全岡山郡仝輩查某囝仔群上𠢕(gâu)走(跑)的咧!講這句話當下,伊愈行愈有元氣,面頂的皺紋,瞬間隨著變成春天燦開的花蕊彼一般!開甲媠giak　–　giak　!

    話講,我細漢綴(tuè/跟)阿母轉去"牛稠埔”(後來,政府為著欲共地名雅化將遮改號作"新興")𨑨迌,表兄,表姊,逐家攏對阮足好!日時𤆬阮去”灰窯仔溝”划(kò)竹排仔,閣騎跤踏車相載,跁上”崗山”挽木瓜和釋迦,庄跤的暗暝,暗嗦嗦,逐家圍坐踮埕頭聽序大人開講回想,講in少年時代的故事種種;閣放曲盤予阮聽!坦白講我真佩服二舅,佇60外冬前,厝內著蓄(hak/購入)有”拉吉歐”(收音機)和”連吉酷”(錄音機),閣收藏誠濟大塊烏膠曲盤,遮物件,攏是我出世了後,生目睭,頭一擺看著!對遮的物件,毋那好奇,嘛足欣羨!暗時佮表兄弟𤲍(kheh/擠)仝一張眠床做伙睏!囡仔時代的雜雜滴滴,到今,攏猶閣深深烙印踮頭殼內!

    接紲來講,筆者佮田寮區新興國小的牵挽情緣------筆者細漢讀田寮國校,先來講這間山區偏鄉學校的簡史,伊佮”新興國小”的關係 ------伊佇民前7年7月初1奉准設立;民前6年5月初3改名做”蕃薯寮(今”旗山”)公學校分校”,民前3年11月初1獨立,改號做”田寮公學校”;1941年改制為”田寮國民學校”;1944年4月初1,奉准設立”田寮國校牛稠埔分教場”;1946年2月初1獨立設校,為”牛稠埔國民學校”;1947年2月1日改為”新興國民學校”;1968年8月1日改為”新興國民小學”;2002年6月21日”田寮國民小學”,行入歷史(廢校)!仝彼年改併入”新興國民小學”,所有自”日據時代”到tann(今),校內歷史文件,學生年籍資料……等攏移交(併入)"新興國小”保管典藏!受”少子化”的衝激欲倚(uá近百年的母校------“田寮國小”煞演變到廢校,而且併入原本伊的分校------“新興國小”的命運!世情的變化,有時定定是予咱料想袂到的?!

    2023年3月,筆者經公開甄試合格,進入”新興國小”擔任母語教師,坦白講接落這份工課,我是ㄧ半歡喜ㄧ半憂,歡喜的是,多年來,攏佇他鄉貢獻所長,會當轉來家己的故鄉任教,是偌呢仔大的福份!另方面,淡薄仔恐惶的是,面對家鄉的子弟(尤其是教著宗親的囡仔),欲按怎以平常心來面對?筆者著捌佇轉去家鄉(屬該學區)參加宗親會的場合,學生囡仔,拑(khînn)著 in序大人的手,來佮筆者見面,向in 父母紹介,我是 in的母語老師!  in 父母誠親切,嘛向望筆者會當多多照顧in的囡仔!我一時煞毋知欲按怎面對?只好用頕(tàm)頭加微微仔笑來回應鄉親的期待!

    翻頭來講,轉來家鄉”------<新興國小>教冊,另外一點,會當踮太太,尤其是後生,查某囝的面頭前,半正經半滾耍笑,展一下仔我小小的成就感,著是"爸爸捌踮(曾在)恁阿公,恁媽媽,恁大舅,大姨,舅公……讀過的國校教過冊捏!遮是我,內心長久以來,一直攏感覺誠榮光誠驕傲的代誌!

 

 

吳     正     任.