鄭和清
正月初六
(2025.02.03)
咱人的正月初六早起時，一起床的習慣和逐工攏仝款，就是那哈唏那拍開手機仔。退休了後，起床就算上班開始，所以點開「Line」，頭𩑾𩑾專心批「公文」。
我的公文大部份是圖片，佇網路頂頭遐仔𪁎趒的少年仔共號做「長輩圖」，簡單講就是問好、問安、問早的圖片。批示誠簡單，只要有掰開來看，就會顯示「已讀」予對方，對方就會知影咱猶閣活咧，我通常攏會紲手閣點一張圖片回傳轉去共對方問早。
這幾工拄好搪著新正年頭，雖然昨昏是初五，初五隔開，佇工業社會，步調較緊，真濟公司行號已經開工，毋過猶有一寡仔較老輩的作穡人，𪜶認為愛到十五元宵的迎花燈和臆燈猜了，才算規个年節仔圓滿結束，所擺廟前榕仔跤猶會當看著像仔我這个年歲的老大人，佇咧跋心適的輸贏無大的臭酸筊仔。
過年的長輩圖攏是紅帕帕的吉祥、幸福、歡樂的文字和圖像。眼著一个猶未退休的同事，伊時間外加減有咧研究風水地理，傳予我一張「立春」的長輩圖，我心頭嚓一下：遮爾仔緊喔，乙巳蛇年的春天來揣咱矣啦！
猶未退休進前，我的工課是按照國曆來計畫和安排，退休開始作穡了後，參農友佇咧來去的當中，難免愛用著農業的詞彙，姑不二將我共農民曆提出來掀，才濟少會當了解𪜶是咧講啥貨。細漢做囡仔的時陣，作穡的序大人講的話題攏是綴節氣佇咧行，我若「鴨仔聽雷」咧，反正和我無關係，常在「一耳空入，一耳空出。」當做馬耳東風，無去共斟酌，所擺干焦對節氣有花花仔的印象爾。
二十四節氣內底的第一个是--立春，「立」就是開始，也就是講開始春天矣。有一个佛光山的信徒，傳來的是星雲法師的立春圖卡，我公文共批轉去：「星雲法師敢毋是前年就轉去佛祖的身軀邊呢？哪會猶閣有今年立春的圖卡？」伊隨回過來，講文字是星雲法師在生所留，但是逐年立春愛做的代誌敢毋是攏遐呢？我閣共讀一擺，諾！「規欉好好--無剉」，真正是按呢無錯呢！
一塊良田春種秋收 / 一家之主承擔責任
攑頭雄雄想著我彼一塊園仔，著咧！立春矣，遐仔食頭路的，年假已經歇煞，今仔日開始上班，我嘛愛動工矣，來去園頭巡巡，園尾看看咧。阮後生𤆬孫仔對臺北轉來團圓，我綴咧歇年，已經幾偌工無去園仔行跤到矣，毋知應該開花的檨仔、荔枝，有照起工吐出花莓無？上㤉潲的草仔，可能囂俳發甲跤頭趺懸矣！
行入去園仔，門喙彼兩欉檨仔敢若衛兵徛踮雙爿，佇咧共我行禮咧。倒手爿彼欉是金煌，有一椏伸對頭前來，袂輸想欲和我握手的款，我行進前，共樹椏小可仔搝懸，看著每一个細椏的葉仔頭攏已經咧拍莓矣，𪜶佇我歇年無來園仔的這幾工，恬恬吐頭出來迎接春天矣。
正手爿彼欉到今我猶閣毋知叫啥物名，因為果子園內底的檨仔是前手地主黃大哥種的，捌問過隔壁彼坵園仔的阿義哥，伊講和這欉嘛無熟似。舊年有著幾粒仔，食起來甜粅粅，閣有小可仔香檨的芳味對鼻空衝出來，但毋是「烏香」。這馬這欉毋知名的檨仔樹嘛規欉攏是花莓呢！
園仔的前半橛共旋一輾，看起來，接手黃大哥的較大欉的，像仔金煌、玉文、臺農一號等等遮仔檨仔，加加減減攏有拍出淡薄仔的花莓；毋過我家己稼接猶閣細欉的遐仔西施、愛文、懷特、凱特等等，卻是恬喌喌攏無嗤噌，干焦彼欉樹仔頭無蓋健，看著欲死盪幌的烏香，卻是展現伊堅強的性命力，莓拍甲足奢颺，想欲證明伊猶閣活咧。
園仔的後半橛是種玉荷包荔枝，照講荔枝花應該愛開矣，毋過今年到立春猶閣覕鬚覕鬚，逐欉攏意思意思開幾葩仔爾，袂輸貧惰囡仔無愛寫作業，凊採撇兩劃就旋去𨑨迌，干焦應付應付爾，看起來今年的範勢應該是「鳥鼠膣，滲無外濟尿」袂開偌濟才著。會記得舊年這個時陣，逐欉荔枝開甲頕倒椏，無閒佇咧採蜜的蜜蜂，颺颺飛，𪜶的動作敢若搝著各種樂器的樂師，嘐嘐叫、噷噷叫，發出空氣振動的聲音，共規个荔枝園成做音樂廳，演奏著大自然的交響曲。我徛佇荔枝樹跤，一觸久仔爾，規个頭殼就落甲攏是荔枝花，敢若拄仔化妝好等欲結婚的森林王子呢！
園仔內有塌咧種幾欉芭樂，白色的花開甲誠媠款，花鬚親像咱人的目睫毛咧，一蕊一蕊對著我佇咧𥍉目睭呢！
立春這工就是農民節，俗語話有「立春晴，一春晴。」的講法，今仔日無落雨，向望今年是好年冬，啊若無，彼句「立春落雨透清明」真正會予我煩惱甲睏袂去，因為清明是三月初七，按正月初六直透落到三月初七，拄好二個月，逐工雨水㴙㴙滴，每日塗跤澹糊糊，人無起痟嘛侗戇。
正月初七
(2025.02.04)
會記得，中年人若喝忝，常在會講：「上卌就袂攝！」，啊阮兩老的攏七十捅頭矣，根本都「初十廿五--無理髮」，欲盍有法度有彼號氣力呢！
蹛臺北的後生𤆬新婦和兩个孫仔轉來臺南圍爐過年，佇初三下晡共因送去搭高鐵轉去臺北了後，阮兩个老的就䖙佇遐喘矣，規个人死殗殗，懶屍甲袂振袂動。
真少見面，規年迵天干焦過年才轉來這一遍，兩个孫阿公長、阿媽短叫袂停，問遮問遐，根本都應袂赴市。活跳跳、嚓嚓趒、蟯蟯趖，無一時定著，𬦰樓梯用走的，落樓梯用跳的，足驚𪜶跋倒去硞著頭殼，喝袂聽，根本無咧共你信篤，只好綴前綴後，兩个加起來強欲百五歲的老歲仔，哪會堪得按呢操呢？
阮牽的經過幾工的養神，元氣有較恢復矣，招我去園仔講欲看伊的菜。果子園當然是種果子為主，毋過佇果子欉和果子欉中央若有較大的閬縫，阮牽的就種較袂著蟲的菜蔬，這站仔伊種韭菜、苳蒿，另外佇籬笆邊，伊種敏豆、皇帝豆，予𪜶旋佇籬笆頂，省去搭棚仔的麻煩。
《本草綱目》內底有記載：「正月葱，二月韭」，阮牽的有栽幾模韭菜，發甲真媠，佇過年前有割一寡仔起來凍，所以過節彼幾工伊有攢「韭菜炒蛋」這齣料理，兩个食漢堡予7--ELEVEn飼大漢的孫，毋捌食過，第一喙就規个呸出來，我共𪜶講韭菜芳貢貢，𪜶共我唱講臭毛毛。
細漢的時，媽媽的菜園仔規年迵天攏種幾模韭菜，韭菜好照顧，羊屎粒仔壅壅咧，𪜶家己就知影通發，久久仔就會當割一改，媽媽若想著就去共雞母偷偷仔提一粒欲孵雞仔子的卵來炒，彼頓阮囡仔就食毋知飽，番薯簽飯加扒咧幾偌喙。唉！時代無仝矣啦！講甲這馬的囡仔，天就烏一爿，莫講較袂厭氣啦！
廿九暝圍爐定著愛食魚丸湯，魚丸代表團圓。有魚丸、油炸粿、苳蒿的魚丸湯，燒燒仔哈，沓沓仔啉，彼真正是勝過山珍海味，鮑魚、魚翅，抑是干貝都無遐爾仔夠氣。廿九彼下晡，阮牽的特別事先挽苳蒿起來囥，按算欲煮魚丸湯，彼下昏暗，魚丸先囥佇火鍋煮，欲食的時才撈起來囥佇碗，加燒湯，加一橛油炸粿，苳蒿用箸夾咧落去火鍋小可仔燙一下，這碗魚丸湯真正是人間美味，啉起來有夠紲拍的，有夠過癮的。
講著遐仔苳蒿，是隔壁園的姊仔發的栽，傷密愛芟一寡仔挕捒，叫阮牽的去徙栽，本底伊無想，我共伊建議去薅幾欉仔倒轉來種，圍爐用的苳蒿就毋免去菜市仔買，因為過年愛食火鍋，苳蒿定著較搶市，為著欲如期供應，菜農可能農藥會澍較重。
苳蒿種落去了後，起先發甲誠媠，想袂到煞去予鳥仔發現，大細欉啄，啄甲變毋成囝去，想講若繼續按呢落去，可能圍爐的苳蒿仝款著愛去菜市仔買。看毋是勢，我和阮牽的縛索仔晾網仔共圍起來，遐仔苳蒿才會當「平安」大欉起來。講起來鳥仔嘛真可憐，寒人根本無啥物物件通食。
「啊！足好的，看樹青、挽菜蔬、蹔塗跤，規个人攏輕鬆起來，腰痠背疼攏無感覺去矣！」佇咧鎖園仔門的時，阮牽的那看西爿咧欲落山的日頭，那笑微微對我講。
「是矣！」我共伊頕頭表示同意，兩个人相向同齊笑出來。這个時陣，予于櫻櫻唱紅的彼塊「愛在夕陽下」佇我的腦海響起，我倒手捾敏豆，正手共阮牽的的倒手搦絚絚，沿仔行沿仔呼噓仔：
夕陽底 / 晚風裡 / 我和你並肩在一起 / 夕陽就像你 / -------
阮毋是佇海邊，是佇園仔邊的田岸路頂，享受田園之樂。
正月初九 (2025.02.06)
今仔日是天公生。昨暗隨過十二點，炮仔聲就迸迸叫，逐家攏搶這个上好的時刻拜天公。我歸仁徛家無拜天公，因為無安神位，公媽猶閣囥佇龍崎祖厝，所以由蹛佇遐的小弟拜天公。
當當炮仔聲響起的時，我斟酌影貓咪有啥物反應無，看伊睏甲足落眠，我就放心矣。會記得伊第一冬來的時，驚甲磕磕傱，隔轉工煞失聲，干焦看伊喙開開，卻是無聽著聲音。我掣一趒，想講飼一隻啞口貓仔，無聽著伊喓喓的叫聲，哪有啥物趣味呢？好佳哉，獸醫講是去予驚著爾。
細漢的時陣，阿爸拄咧拜天公的時，阮囡仔早就唔唔睏矣，毋過，透早攏會搶看啥人上代先起床，逐家數想的是彼甌甜甜的四果茶。四果茶的成分是冬瓜條、金桔餅、紅棗、龍眼乾，佇彼个四秀仔誠欠缺的年代，早頓食紅龜粿配四果茶，彼是足紲拍的享受呢！
講起來，作穡人真可憐，愛看天食飯，甚至連「食稱飯也著看天時」，可見天公佇作穡人的心目中的地位是偌爾仔懸。有一句勉勵人的話：「人定勝天」，毋過根據我七十捅冬的人生經驗，著，是無毋著，但是嘛猶有「目睭金金人傷重」的時陣。所擺，我雖然是讀科學的，毋閣我對天公伯的敬重是共作穡人仝款的虔誠。
佇園頭，我雙跤徛齊齊，雙手合掌，兩眼看天，祈求：「請天公伯保庇作穡人年年攏會當豐收，攏有一喙飯通食，
拜託！拜託！」今年立春彼日好天，天公生這工嘛大晡日，但願會若農諺講的：「立春天氣晴，百物好收成。」
正月十二 (2025.02.09)
自一九七六年開始，臺南市有一个全國獨一無二的迎春古禮，佇府城大東門﹙迎春門﹚舉行「祭先農」祀典。下早仔九點，市長黃偉哲先生欲進行祭天典禮，象徵春耕的開始。
我市民卡提咧，免費公車坐到東門城站落車，迎春門的圓環攏是看鬧熱的人，圍甲插插插。彼隻春牛和芒神已經照乙巳年的服色重新油漆過，而且事先佇正月初一請道士開光完成。今年的春牛懸四尺、長八尺，尾一尺二寸，頭藍色、身紅色、腹紅色，牛角、耳、尾烏色，跤胴藍色，牛蹄白色；牽牛的芒神嘛有伊的服色妝娗，徛佇牛的正手爿。我用手機共翕落來，揤快門的當下，我共家己講：「今年的耕作開始矣！」
市長祭天的儀式完成了後，鬧熱陣一陣綴一陣表演，表演者逐个喙笑目笑，觀眾看甲喙仔裂獅獅，我嘛綴人噗仔拖咧一直拍。遊行的隊伍會對臺灣府城隍廟經過，終點站是延平郡王祠。我「紅目有仔鬥鬧熱」，綴咧行一段了後，知影跤路較䆀，毋敢閣行落去，公車坐咧，轉來厝食中晝。
暗時佇鹿耳門聖母廟舉辦「鞭春牛」的儀式，那頌唱「春牛讚」那用彩杖揲春牛十二下，了後共春牛捒落去臺跤，和人群耍「搶春牛」的活動，聽講若有剺著春牛身軀的紙的人，會當旺規年。我知影人會足濟，閣是暗時仔，老歲仔無彼號氣力去共少年人𤲍櫼，家己認份蹛厝看電視轉播。
看著春牛無三兩下手就予心狂火熱的觀眾五馬分屍，我祝福遐仔跤手較猛掠有剺著春牛身軀的紙的人，乙巳年的運氣會嶄然仔好。
正月十五 (2025.02.12)
氣象報告講會落雨，本底我是有淡薄仔憢疑，氣溫是有影較生冷無毋著，毋過應該袂落雨才著。想袂到，眠夢中就有聽著雨棚仔的㴙㴙滴的雨聲，一聲、一聲，我親像睏袂去的失眠者佇咧算羊仔幾隻咧。雄雄宋朝蔣捷的詩句「一任階前，點滴到天明。」傱入來頭殼內，就據在雨棚仔的雨，一點點、一滴滴去滴，滴到天光矣！敢毋是咧，「鬢已星星」的暮年，除了放下、看開，猶閣有啥物非操煩不可呢？
天貓霧仔光，拍開窗仔一看，雖然是霎霎仔雨，毋過打馬膠路攏澹去矣。俗語講：「毛毛仔雨落久，塗嘛會澹。」閣有影呢！毋過這句話有伊積極的意義，是咧鼓勵咱人若加減做、加減趁，也會賰一寡仔家伙。
天光矣，雨猶原咧落，霎霎仔，無大；天暗矣，雨原在咧落，毛毛仔，已經落一工矣。立春彼工無落雨，元宵節卻是沓沓滴滴落袂停，毋過好佳哉，雨細無霆雷，啊若無彼句「立春霆雷，十處豬牢九處空。」會予我煩惱甲半小死。細漢蹛庄跤，豬仔若著生驚，傱出去豬牢，阮囡仔著愛四界去揣豬，共豬攔轉去豬牢。這馬已經無小農戶咧飼豬，攏是大養殖場企業經營矣。
暗時仔的電視新聞，有講著各地元宵節趣味好耍的風俗。自娶某搬徙來歸仁蹛，佇囡仔讀國校彼段時間，差不多逐冬攏會𤆬𪜶去廟埕臆燈猜，誠心適，嘛捌陪𪜶去迎花燈踅社區行一輾。囡仔攏嫁娶晟了後，我嘛捌有一擺，和阮牽的綴社區的囝仔去遊社區，若行若唱「當我們同在一起」。
上予我難忘的是，細漢蹛佇龍崎山頂的時陣，猶未牽電火，無路燈，厝邊頭尾三戶的囡仔逐个相招去菜股仔，佇月娘的見證之下，查埔囡仔跳菜股，那跳那講：「跳菜股，娶媠某。」；查某囡仔手薅葱，沿仔薅沿仔唸：「偷挽葱，嫁好翁。」共菜股舞甲若去予生驚牛𧿬踏過咧，結果隔轉工佇猶未娶媠某、嫁好翁的進前，就予序大人罰跪做一排，掃梳笒仔若直直落的西北雨，夆捽甲哀爸叫母。
正月十七 (2025.02.14)
若照古早例，元宵節的花燈迎了，燈猜臆完，年就正式結束，作穡人愛開始浞田塗矣。
昨昏落一工的雨，我揣這个毋是理由的藉口無去園仔，窮實，對作穡人來講，雨愈大，狀況愈濟，愈更加愛去園仔，敢毋是咧？今仔日透早起來，雨猶閣佇咧落，雨勢有較大霎霎仔。
「今仔日是啥物節氣矣？」比我較早起床，已經批完公文的阮牽的，看我佇咧掀農民曆，問我。
「無啊！嘛是猶閣是立春呢！」我無攑頭看伊，繼續掀我的農民曆，我想欲揣看菜瓜會種得未？
「今仔日敢毋是有一个啥物節呢？」阮牽的斡對灶跤去：「你去掀曆日仔看覓。」
「啊！夭壽骨喔！」我喃佇喙內，今仔日是西洋情人節呢！阮牽的咧共我暗示啦！
猶未結婚的進前，佇情人節捌送過阮牽的玫瑰花，已經真久無佇咧慶祝矣，伊哪會雄雄閣想起呢？想著查埔人袂使像梁山伯按呢，做一隻「呆頭鵝」，我隨雨衫穿咧，機車騎咧，一輪騎二十，欲來去園仔。前幾工仔薅草的時，我有看著檨仔跤有淺紫色的「熊耳草」，風微微吹，𪜶輕輕搖，敢若有氣質的小姑娘仔咧對我駛目尾，誠媠，我毋甘共薅起來，想欲留咧欣賞。這馬，我就欲來去挽轉來送阮牽的。
有花，嘛愛有tsioo-kóo-lè-tòo，停佇路邊的「7--ELEVEn」，貨架的頂懸啥物品牌攏有，我花彔彔，毋知佗一品牌較好食，落尾選一粒原味、無糖的，因為阮牽的逐工磅體重，我驚伊隔轉工磅體重的時，會激司奶聲共我抗議：「攏是你啦！爸爸啊！彼粒tsioo-kóo-lè-tòo足顧人怨呢！」
阮牽的今仔日早起去圖書館做志工，中晝轉來拄入門，我就共花和tsioo-kóo-lè-tòo雙手㧣予伊：「情人節快樂！」
阮牽的掣一趒，叫甲足大聲：「哇！哪會遮爾仔媠，這是啥物花啊！」順手㧣倚鼻空鼻芳。
「學名號做『紫花藿香薊』，若熊的耳仔咧，所擺嘛叫『熊耳草』。」我知影伊會問，事先上網路查好，驚記持䆀，特別寫佇字條仔。
「讚！讚！讚！」阮牽的對我比大頭拇：「送淺茄仔色的『熊耳草』比玫瑰花閣較有意義！爸爸我共你按三个讚！」
沒有留言:
張貼留言