1.<憫農詩> Bín lông si
藤籮絆跤趾 Tîn lô puànn kha tsí
茉草黏我衣 Bua̍t tsháu liâm góo i
竹刺抅破褲 Tik tshì kau phuà khòo
規身汗淋漓 Kui sin hān lîm lî
2.<山芙蓉> Suann phû iông
日出雪白晏粉紅 Ji̍t tshut suat pe̍h uànn hún hông
我來山野尋芳蹤 Guá lâi suan iá sûn hong tsong
花開攏佇霜降後 Hue khui long tī sng kàng āu
千面美人山芙蓉 Tshian biān bí jîn suann phû iông
3.<王 梨> Ông lâi
王梨吐蕾若松子 Ông lâi thòo luî nā siông tsí
熟黃食著芳閣甜 Si̍k n̂g tsia̍h tio̍h phang koh tinn
欲食刻目蓋稀奇 Beh tsia̍h khik ba̍k kài hi kî
傷青食著咬喙舌 Siong tshinn tsia̍h tio̍h kā tshuì tsi̍h
4.<弓 蕉> Kin tsio
一芎弓蕉百外子 Tsi̍t king kin tsio pah guā jí
窗前樹影添詩意 Tshong tsiân tshiū íng thiam si ì
蕉莖纖維可編衣 Tsio king tshiam bî khó pian i
笑談蕉皮治相思 Tshiàu tâm tsio phuê tī siunn si
5.<楊 桃> Iûnn thô
生做五稜誠奇巧 Senn tsò gōo lîng tsiânn kî khiáu
親像弦月倒彎曲 Tshin tshiūnn hiân gue̍h tò uan khiau
橫切形似雨傘展 Huâinn tshiat hîng sū hōo suànn thián
落喉止渴涼心頭 Lo̍h âu tsí khuah liâng sim thâu
6.<甘 蔗> Kam tsià
甘蔗生作懸閣俏 Kam tsià senn tsò kuân koh tshiàu
親像阿君赫緣投 Tshin tshiūnn A – kun hiah iân tâu
入冬蔗花輕搖動 Ji̍p tang tsià hue khin iô tāng
上驚山蠔挹塗空 Siong kiann suann hô iah thôo khang
7.<見笑草> Kiàn siàu tsháu
莖葉發幼刺 King hio̍h huat iù tshì
粉紅花嬌媚 Hún âng hue kiau bī
亦無見笑代 À bô kiàn siàu tāi
何故含怯意 Hô kòo hâm khiap ì
8.戲劇人生------台前˙幕後 Hì kiok jîn sing
鑼鼓鋟仔鬧猜猜 Lô kóo tshím á nāu tshai tshai
男女畫妝踮後台 Lâm lú uē tsong tiàm āu tâi
生旦傳情目尾使 Sing tuànn thuân tsîng ba̍k bué sái
丑仔撒潑展詼諧 Thiú á sāi phuat thián khue hâi
9.<”蛇仔穴”傳奇> Siâ-à-hiat thuân kî
南高市界灣崎溪 Lâm ko tshī kài uan kiā khe
二層溪流來相會 Jī tsàn khe liû lâi siong huē
竹頭蛇穴是龍脈 Tik thâu siâ hia̍t sī liông me̍h
世外桃源好徛家 Sè guā thô guân hó khiā ke
[注解]:”蛇仔穴”位於今田寮區西德里新路仔;是灣崎溪與二層行溪
交會處,地理稱之為”相佮水”(sann-kap-tsuí)寶地,地勢呈蛇頭狀.
10.<目屎流墓>傳奇
猴洞地界旗竿崙 Kâu tōng tē kài Kî-kuann-lūn
清朝有設營盤汛 Tshing tiâu ū siat iânn puânn hún
官人風水被作徼 kuann jîn hong suí pī tsò khiò
墓牌迸裂流淚痕 Bōng pâi pìng liah lâu luī hûn
[注解]:墓原位於今南市關廟區”龜洞”(舊名”猴洞”,旗竿崙路旁竹林內,今已被毀!)
作者 : 吳 正 任
沒有留言:
張貼留言