永浴愛河------<春 望>

 

 

    <春望>這首歌,是我上愛聽的一首歌!我頭一擺,聽著這首歌,是佇成大臺文所,所裡策劃的一項活動------[臺文週]的課堂上,邀請著臺灣本土歌謠音樂家------王明哲老師,來佮學員分享,伊三十外冬來,拍拚創作,認真生活,長年感受著跤踏的土地,自然的脈跳,佮成長過程,拄著挫折毋認輸,彼款臺灣人堅韌的性格,一路行來起伏跌宕( tia̍t - tōng )的性命故事,所孕育出來,憾動人心的音樂作品.

    彼工,王老師,手提吉他, khuè踮跤頭趺,坐佇教室中央,學生坐踮伊四箍圍,注心聽老師撥動琴弦,隨著一蕊一蕊音符漾開…….老師tau – tau 仔開講,伊坎坷飄浪的成長故事,伊沿那(一邊)開講,沿那(一邊)自彈自唱,有時頭攑高高,有時微微仔愰頭,有時目珠kheh- kheh ,有時無張持捲舌呼哨( khoo – si – á ),渾然忘我,陶醉佇溢滇空氣中的情境,學生的神魂,嘛綴咧坐著老師手指頭撥弄旋律的翼股( si̍t – kóo / 翅膀),翱遊佇音符鋪陳出來的美妙藝術氛圍裡!

    佇這場欲倚(uá)三點外鐘的講座時間內,王老師發表成十首自創曲,其中予我聽了,印象上深,到今(tann)猶原戀戀難忘的,著是<春   望>這塊歌;遮是一首青春男女,互相意愛,毋過,藏佇心肝內,彼份歹勢講出喙的觸纏,藉著淺白幼膩(iù - gī)若詩的歌詞,傳達出繾綣( Khián - khuán )情意,毋管歌(聽)者,是正當青春年華的查埔抑查某囡仔,仝時攏會綴咧墮入戀愛的氣氛!著算講是伐(hānn)入初老的序大長輩,只要聽著這塊歌的音符響起,目珠小放kheh- kheh ,著隨會予聽的人,心平靜落來,綴著慢板舒緩的旋律, tshuā領咱,轉去到青春懵懂( bōng - tóng )的年代,暗暗仔談著戀愛,啖( tam )著彼款心肝頭 phi -  pho̍k – tshái ,講袂出來------酸甘甜仔~酸甘甜的滋味!------少年少女詩一般的情懷……

     講到遮,筆者就來共<春望>這首歌的歌詞(漢羅版),鋪踮下跤,(另外附作曲家送予筆者ㄧ份伊親手寫成,極珍貴的手稿”簡譜”,向望會當一併刊登):

    

<春     望>     作   詞: 陳   明   仁   /   作    曲: 王   明   哲

Tshun   thinn    ê     hue          Hia     nì    tshing   phang

春       天     的     花     /     遐     呢     清     芳

Kam   guān   tsò    phang       Tsiú     tī    hue   tsâng

甘     願     作     蜂     /     守     佇     花     欉

Tshái   lí      ê     hue   hún          Thn̂g    tinn     bi̍t    kam

採     妳    的     花     粉     /     糖     甜     蜜     甘

Tshun   thinn   sī   lán    ê     bāng

春      天     是    咱    的     夢

 

Tshun  thinn    ê      iâ    á             Hi    lāng   hue   tsâng

春      天     的     蝶    仔     /     嬉     弄     花     欉

Bô    sîng     bô     ì          Mài      kà    guán   lāng

無     誠     無     意     /     莫     共     阮     弄

Guán   tng    tshing   tshun          M̄       pa̍t    puànn   hāng 

阮     當     青     春     /    毋    捌     半     項

Tshun  thin    sī   guan    ê    bāng

春     天     是     阮    的    夢

 

Tshun  thin    ê    hong        Tshiànn   lí      sió    tán

春     天     的     風     /     請     妳     稍     等

Guán   ū    sim    sū          Beh     kà     lí     káng

阮     有     心     事     /     欲     共     妳     講

Tsiong   guan   ê     hue    hún        Kià   bāng   tshun   hong

將     阮     的     花     粉    /     寄     望     春     風

Tshun  thinn    sī   guán    ê     bāng

春      天     是     阮     的     夢   

    

    咱用心來體會遮歌詩(詞)內底的意境:頭一葩,少男共少女比論做春天裡拍莓,欲開未全開的少女,嬌美閉思,像散發出淡淡的芳味的”花蕊”,涎著(siaânn/誘)少年家,暗自迷戀,甘願家己化做一隻蜜蜂,暝日守(tsiú)佇花欉,採著花粉,身影不離,糖甜蜜甘!

    第二葩:少女共多情的少年家,比論做”蝶仔”,逐工(暝日)圍著花欉,飛來飛去,是出自真心?抑是假意?人阮(少女)當青春,未踏出社會,內心單純無瑕,複雜的人情世事對阮來講,分袂介清,嘛應付袂來!若無誠意,毋通亂使共我嬉弄……

    第三葩:佇文學析賞藝術內底,大自然的”風”,因為伊隨著空氣四界流動,予凡間男/女,甚至古今的”文學人”,當作”信差(使)”,傳送內心的願望,祝福的寄託;少女原本清純的心,袂堪得少年家,暝日用話語示好,佮行動親近…..終其尾,心湖煞漾開一圈一圈水泱……只好共心內話,寄望春風,傳送到遠遠的所在,去予思慕的人…….

    

    聽完這首歌,毋知讀者有啥款的感觸?雖罔藝術的感通層次,隨人無仝( bô – kâng ),因人而異!毋過,咱若加聽幾遍,內心幽微深落的所在,著是講咱已經成做人的牽手抑翁婿,歲月的滄桑,生活的擔頭,翁仔某之間,感情的濃度有淡薄仔消褪,毋過,曾經有過的甜蜜,總是值得咱翻頭去回味佮探揣!這首歌優美的旋律,會引tshuā咱轉去佇柔情蜜意的青春年代……

    

P.S,: 1.佇遮,筆者欲來講這首歌,作詞作曲者合作完成創作過程,音樂佮人的故事------作詞者陳明仁老師,佮作曲王明哲老師,因為早年對臺灣的民主運動,理念接近,進一步相識相知;王老師定受邀,踮友志聚會場合演唱,撫慰人心,尤其是充滿臺灣元素風味的自創曲,相當受歡迎!有ㄧ工,王老師讀著陳老師創作的這首歌詞(歌詩),意境誠好,心內著有欲共提來譜曲的發想.

2.創作因緣: 彼年,陳老師佮志同道合的女朋友,交往一段期間,到了”論及婚嫁”提親籌辦婚事的階段.婚期定好勢.王老師自然而然成作雙方紹介人(作"便媒人").婚宴彼工,王老師佇宴會場,發表這首誠合人/合時/合場合.....誠感動人的情歌,獻予這對郎才女貌的新郎佮新娘.(王老師回想起這段故事,拍納涼("調侃家己")------這場婚禮,家己的身份是紹介人,本底主家愛包"媒人禮"予伊,抑"媒人公"仔,嘛愛包一个禮數,祝賀友志完成終身大事!毋過,因為雙方是熟識多年的好朋友,遮紅包/禮數攏省起來.)筆者個人主觀認為: 純就"藝術/文學/音樂創作作品價值"來看------佇婚禮獻唱這首歌,伊的意義,高(懸)過有形的紅包數字千百倍!

3.這首歌,藝術價值真高,有收佇王明哲老師的創作<<海洋國家>>專輯內底.

 

姓        名: 吳     正     任

職        業: 國中臺語文教師

臉     書:  TsingJimNgoo