夢裡˙紅樓

                                             

                                                                                           吳正任

文友 Yuwei  S. ,佇2023年8月29日,踮伊的面冊頂頭,轉分享一截Tīng　　Bûn　–　Ian先生貼文(原貼文日期:2020/5/5)------<紅樓夢人物關係圖>,因為筆者佇大學時代修過<<紅樓夢賞讀>>這門課,幾仔擺,想講:” 心愛定落來,共這本冊讀(看)予完”;毋過,坦白講,逐擺冊看到1/3,著予冊內底複雜的人物關係,拍退堂鼓!家己揣藉口想講後擺興頭若來才閣繼續讀!毋過,一擺閣一擺,意志攏無堅持!嘛是閣稠踮”半途”,講起來誠歹勢?!

    筆者會對這篇文圖產生赫爾大的興趣,主要伊共1.寧國府2.榮國府3.史府佮4.薛府內底複雜的人物關係,做詳細整理,而且繪成圖表,遮對讀這本小說的人,提供誠大的幫贊;到今(tann),我猶閣保存修讀期間,期中/期末考試的試題,保留落來!

    會記得,期中考試,捌出過論述題------”十二金釵”人物,其中王熙鳳佮薛寶釵,等女性,性情個性對比……甚至出一題: 榮國府家宴內底,有出一路”茄羹”的料裡,這路菜,製作的工序誠幼路複雜,有欲成十項工序,請說明?這款食食(tsia̍h-si̍t)的題目,一般來看,這款冷僻題目根本著無啥重要,出題教師袂輸假若像朝工欲共學生考予倒仝款!有影,彼擺題目考倒誠濟人!

    阆(/隔)幾仔冬了後,國內某報副刊,闢一个專欄,聘名作家”駐版”,開放讀者佮”駐版”作家互動,提問的問題無設限,一般的,攏會得著作家誠懇的答覆.

    有一擺,輪著出世佇臺灣,南投,大漢了後,去國外讀冊,發表足濟關於煮食(烹飪/飲食)文學方面的創意料理,而且出版成冊,伊獨特的烹飪美學著作,誠受讀者歡迎,後來,佮伊的翁婿搬徙旅居踮香港的作家------蔡珠兒女士------駐版.

    “著(tio̍h／對)的時間,拄著著(tio̍h／對)的人”,囥踮我心肝底的,兩項有關藝文佮煮食的問題,今(tann)有人通請教矣!我著用e-mail,共欲請教的問題,傳送予副刊,踮遮,我著提問的問題公開予逐家做參考,第1項: 六十外冬前,佇香港發行的”八開”,大本的彩色綜合雜誌<<今日世界>>,後來哪會無閣繼續發行?伊的內容,毋那有國際時事要聞,有當時香港影歌星動態,猶閣有棋藝教學,佮文藝小說等……內容足豐湃,精彩,佇彼个年代,算是tshuā(帶/引)領時代風潮的優質雜誌!   

    第二項問題,佮”煮食(烹飪/飲食)文學”有關請教蔡老師------<<紅樓夢>>小說內底的情節------有一擺”賈府”,舉行一場家宴(人客有劉姥姥……),主家特別秀出一路講美食嘛無算啥美食,講珍貴嘛無算介珍貴,毋過,誠有特色的一齣菜譜------<茄羹>;根據冊內底描述,手路誠幼,前後有十外項複雜的工序,毋知美食家蔡老師,敢捌親手烹調過否? (這題我共提來請教蔡老師,確實有淡薄仔為難人?囥佇現此時來看,材料:” 茄仔(kiô-á)”,遮爾普通的菜蔬,嘛可能予人看無目地?

    尾仔,筆者的問題,佮蔡老師的答覆,攏有刊佇副刊頂頭(見報).關於<<紅樓夢>>,這本冊相關的評論,街市坊本,不止仔濟,料必文友,加減有看過;接紲,值得提出來談論的是:

小說內底,次要(毋是主要角色人物),親像元春探春惜春秦可卿巧姐…….甚至無介顯目的低層人物親像遐眾ㄚ鬟,婢女------晴雯,花襲人,綺霞,麝月,碧痕,檀雲,墜兒…..等; 藝術/文學家蔣勳教授,有創作(出版)一系列(七~八本)名作<<微塵眾>>的”副冊”,對遮低層人物的身世/性情/等,佮各人對人生的態度,有詳細的紹介.

    佇遮,筆者欲來摘引蔣勳教授,對<<紅樓夢>>這本小說的看法,感想,佮伊本身創作<<微塵眾>>,冊內底,對遮小人物性情的評析,做一下仔概述:

     1.<<紅樓夢>>小說內底的人物,字姓(姓名),作者偏愛用”漢字諧音”,來”影射”相關人物的個性,特質,這點,確確實實,影響著後來小說家,落筆的時,攏參考這款手路.

     2.咱uí　冊內底,第5回,文字所描述的情節,著量約知影”結局”,會是按怎矣!

     3.小說內底情節,”大”事為”假”,毋過,”小”事中所表現的,四界攏近”真”!

     4.劉姥姥佇”大觀園”內底,伊身為一个庄跤,知識水準低的老婦,生活踮四箍  

      圍,教育較懸層的眾親友之間盤撋(nuá),表面看起來,像有袂鬥搭(突兀)的感

      覺,詳細共看,窮實,伊閣袂予人牙朽(討人厭)排斥!

   咱就頂面第4點進一步來講,蔣勳教授指出,劉姥姥這位庄跤老阿媽,做人的特色,有下面遮三點:

 

1.     鄉土語言,充滿性(生)命力!會使得講,伊的自然反應,源自伊生活的鍛鍊,佮出世本底,就具有母性原始的求生本能.

2.     伊知影欲按怎看人面色(察言觀色),佇啥款的場合,講啥款的話;袂去得失(得罪)人!

3.     通達人情義理:腹腸闊,看會開,雖罔世故,毋過,誠捌(識)道理,得人和.

    蔣勳教授認為<<紅樓夢>>這本小說,只要欲詮釋------身處(生活)佇殘酷的權勢腐敗的富貴中,毋通袂記咱人”性本善”的本質!為人性的反省留落最後一點點仔溫暖的空間!伊相信,終其尾,世間猶是溫暖的!加(ke/ 多)看(讀)一擺,著會更加瞭解著性(生)命的不忍心!仝( kâng/同)時,對性(生)命,會爆(pok)出另外一款厚重的牽挽情緣!