花非花------兩个葛纏我的夢

 

 

                                                                                                          吳正任

    有一條歌,歌詞是按爾寫(唱)的: “花非花呀,霧非霧呀,夜半來,天明去,來如春夢不多時,去似朝雲,無覓處……”!遮短短幾句詞,予人讀(唱)著心驚驚,正正是”夢”的縮影,人生若眠夢的寫照!

    講著”夢”,伊是咱人精神恍惚,抑是歇睏猶未落眠坎站,一目睨仔,走閃過頭殼內,若幻象的情景,到底是妖?是魔?是神?抑是mǹg-sngh ?咱誠歹用文字去描述,抑是透過戲劇的演繹,共具象化!

    自細漢到今(tann),做過算袂完的夢,快樂的,悲傷的攏有,伊是咱無法度選擇的!像咱平素時定佇講的”禍福相倚(uá)”,好䆀交摻發生的.

    幾仔十冬來,我做過的夢,印象上深,較迭(tia̍p)佇夢裡出現觸纏我,按怎撥著撥袂離的有兩款:

    頭一款是------”趕袂赴車幫,急甲流凊汗”!------ 細漢蹛山內斗(貼)底,中學時代,早暗攏愛坐客運,來回四,五十公里通學,偏偏車幫少,學生囝仔,透早攏愛坐6:20固定頭班車,若跤手慢鈍趕袂赴,彼工可能著愛欠席矣!因為下一班車,著即欲倚晝(uá-tàu)矣!                         

    第二款是------“考試時間即欲結束矣!題目寫(答)袂完”!------細漢到今(tann),經過千百擺考試的挑戰,折磨,講袂出考試來的時,彼款緊張的情緒佮驚惶!慘啦!明明試題著會曉答,哪會閣有赫濟題目猶未寫?偏偏時間偆無幾分鐘?!這款”夢”,勞碌觸纏我幾仔十冬! 咱人一生的身份,定定攏是”流動(轉換)”的!著是講,遮二十外冬來,我已經徛上講台,烏枋頭前,成作教師的身份,這款夢,喊來著來,三不五時,猶會閣出現踮我的夢中!

    總是,”夢”來無影,去無蹤!毋是咱有法度通控制的!毋過,佇現實的生活當中,咱若不管時攏保持樂觀的態度佮心情,按爾,我相信:未來的每一工,攏有好事發生!

    祝福所有的好朋友------美夢成真!逐工攏快樂!