第三屆阿公店溪文學獎 白鴒鷥飛過廟埕來到故鄉的溪邊

白鴒鷥飛過廟埕來到故鄉的溪邊

--國小囡仔台語詩評選感言

蔣為文

 

咱阿公店溪文學獎已經三屆ah！今年參賽的作品ke真濟，品質mā有提升，值得o-ló kap歡喜。

咱若kā這擺入選的作品排做伙，「廟埕」、「溪水」、「白鴒鷥」、「山kap海」、「芳味」、「蘆花」、「草仔枝」、「典寶溪」、「故鄉」、「驕傲」tsia的標題形影tú-hó會使真suí-khuì表現出阿公店溪流域的文化。

Tī用字的部份，這piàn參賽作品普遍tik會用教育部公布的台語推薦用字kap台羅拼音方案，tse顯示經過kuí年的推廣，小學教學現場已經普遍接受使用。

Tī寫作技巧方面，前三名的作品實在無輸大學生！我ta̍k年tī成功大學台灣文學系大學部lóng有開台語寫作課，而且要求學生ài練習台語創作。咱若kā人講前三名的作品是大學生的創作mā無人會懷疑。

第一名的「廟埕看戲」，m̄-nā描寫出台灣廟埕傳統文化，mā hōo人聯想tio̍h作家「向陽」有名的台語詩「搬布袋戲的姊夫」。第二名的「故鄉的溪水」hōo人深深感受tio̍h作者對故鄉「阿公店溪」kap「大崗山」的hit份甘甜kap心悶。第三名的「白鴒鷥」kā台灣莊腳tiānn看的白鴒鷥鳥隻生活習性描寫kah真siak-phah，mā 反映出台灣西海岸「日頭落海」的美景。

Uì今年的成果會使看出，學校若有用心從事台語教學，學生囡仔m̄-nā會當kā台語講了真好，koh會使tī創作頂頭有真suí的發揮。Tse mā是咱辦阿公店溪文學獎的ǹg-bāng。