˙過”銀錠山”
最近兩擺經過”銀錠山”,攏佇舊年,一擺是咱人2月,去”羅漢門”看鬧熱------迓佛祖;一擺是新曆6月,去”銀錠山”跤細條(liâu)台地,參加遐在地文史協會辦的”惡(bái)地(擺攤)市集”,聽在地<台青蕉樂團>演唱,買草仔粿,食炒米粉佮仙人掌做的芋冰.
對”羅漢門”這个所在,充滿著想像,是 uí <<臺灣歷史文獻>>頂頭發現------明˙永曆年間”太樸寺卿”沈光文先生,捌佇這个所在,起幾間草茅,設立”學(ô) 仔”,教授生徒佮番童;1721年,“羅漢門”(即馬”光興里”)遮所在,亦著是”鴨母王”朱一貴,民變起義事件的烘爐地,後來,民間共伊號作”臺灣第一个平民皇帝”;接紲,閣有三百外冬前”紫竹寺”觀音佛祖,幾仔擺香爐,家己揣駐駕福地,飛上林拔仔欉枝椏,踏地理的種種傳奇.lím (近)十外冬來,咱國交通部,共遮所在各庄頭,庄民為著欲守護家園,自發地,學拳練武,跳宋江,遮幾仔百冬傳湠落來的宋江陣文化,訂作咱國年度十二大節慶之一;每年若到農曆2月19觀音佛祖生,攏會舉辦全國”大專青年創意宋江陣比賽”;了後,春天若到,我攏會想欲去遐看鬧熱,感受節慶的氣氛!聽我阿母講:伊初嫁來”水蛙潭”彼幾冬,逐年佛祖生,我二姆攏會招同姒仔,uí”頂寮”跁上”烏山”山腰,經”王爺廟”, tsánn 過一瓣一瓣海銀塗的白崩坪,踅過”銀錠山”跤,行欲成半埔,去羅漢門紫竹寺,共觀音佛祖燒香!
講著”“銀錠山”,伊是位佇即馬高市田寮區/內門區佮旗山區的kap界,若uí 西北爿------”州界”(即馬”縣道182”,出”龍崎”向東,公路順山稜拍箍盤踅,到遮轉一大uat,著是古”台南州”佮”高雄州”的隔界);徛踮遮,看uí 東南向去,著有看著一座山峰,呈現菱角形,抑金元寶樣相,因為遮四箍籬仔,地質屬”海銀塗”(惡地),Soo- pai, 日時抑暗暝,日頭抑月娘若跁上山,會發出銀色的光芒,映照山峰,規粒山,著像ㄧ粒”銀錠”(銀的元寶)彼一樣,山的字姓著是按爾來的;除了”州界”,uí內門”紫竹寺”書院前佮”腳帛寮”遮所在,猶有”瑞山里”活動中心埕前,看”銀錠山”,形貌尚清,尚明!咱看”瑞山里”活動中心,埕前一對石刻的對聯-----<銀屏獻瑞˙寶山玉璽>佮”銀錠山”遠遠對相!著知影千百冬來,”銀錠山”,攏恬恬守護遮,環山部落的子民!
咱若uí東南爿------旗山區往西,行”縣道184”,到”花旗山莊”,過”旗亭橋”,一直到”三協里”46號人家茨,遮截路段,攑頭看-----”銀錠山”近佇眼前!毌過伊山的樣相煞變成一隻馬! uí 西北趴向東南爿,抑若uí 田寮 ”鹿埔”,向東北方向看去,伊變成一隻頭攑懸,;像欲跨步向前的駿馬,仝款這粒山,遮爿的人,攏共號作”馬頭山”;縣道184 ,出田寮”月世界”,”古亭”,”鹿埔”,跁上”百二坎”,”馬頭山”著出現佇眼前,遮節路段,離馬身上近,規隻馬,頭到頷頸,腹肚,尾椎,到馬尾,規个山形,成(像)馬成甲無宛然!抑欲往旗山的”縣道184”,著箍uí “馬頭山”山跤過,佇馬頭的所在,uat一個uat,到遮開始落崎, 按爾著算hānn 入”旗山區”的地界矣!
著佇”馬頭山”頭前無偌遠,旗山區三協里46號一戶姓黃的人家,茨後有一支尖尖的細山崙,當地的人,攏共號作”馬杙khi̍t仔”;傳講遮支山是縛馬柱,踅uí 彼茨後”馬杙崙仔”50公尺跤兜,山路邊,有一跡約3伐步方圓的”牛踜窟仔”,聽一位婦仁人講:”這窟”馬枓táu(槽)水”,長年袂焦,涸旱的時,四箍籬仔的住民攏來遮汲水,遮流傳一句俗語:”雙跤踏雙金˙雙手捧phóng水lim”,詳細看,這窟”馬枓táu(槽)水”,邊仔有兩塊跤踏石,予人踏甲烏金!婦仁人閣講:”馬頭山”東爿面,山跤有3港泉,頭港是鹹水,類似馬的鼻siûnn鹹鹹,中央港是”tsiánn水”,抑尾仔港”半鹹tsiánn” ,鼻著像馬尿的味!..........過”銀錠山”,踅過”馬頭”,著伐入”田寮區”地界,落”百二坎”的長崎,連鞭著到”鹿埔”,”古亭”,過”古亭橋”,著進入”月世界”矣………!
˙過”朝元寺”
Uí “崗山頭”,沿”大崗山”東爿山跤,這條路迵”崗山路口”,長約四公里,屬”鄉道37”.這節路段雖罔短,毌過,誠濟所在,留落人文遺跡,值得探訪;咱uí 崗山頭這爿紹介起:
溫泉旅社,前身是日本時代,日警洗浴養病的所在,水質屬碳酸鈣冷泉,溫泉區頂懸,是”大南天福德祠”,遮地勢懸,視野開闊,會當看夠中央山脈,咱人2月初2,土地公生,攏倩幾仔棚布袋戲,佮歌仔戲來搬;遮幾冬來,每年元宵,攏辦跋桮乞龜比賽,龜王一冬一冬,愈跋愈大隻,即馬已經到甲欲規千斤矣!這款民間習俗,煞變成地方的節慶.
佇“福德祠”後壁,成百公尺山腹所在,有一條長閣隘的峽谷,欲倚幾仔十公尺深,彎彎 khiau -
khiau ,像ㄧ隻大蟒蛇,盤踅佇裂開的咾咕石壁,長欲倚成公里,山壁攏是鐘乳石,遮號作 <龍磐峽谷>,有武俠電影來遮拍片,這條峽谷,若欲論伊的長,抑險奇,該當是台灣第一!
向南,來到路邊電火柱,頂懸細鐵牌,縛<後山高分29>路下,一戶姓黃人家茨邊,龍眼樹下窪谷,有一窟千年袂焦涸的靈泉,uí茨後”大崗山”壁,滲入地下的伏流,再uí 塗跤nǹg出,清涼無比,可飲用,嘛會使得洗浴;閣向南,進前約100公尺,遮節路段(抑著是電火柱頂縛鐵牌仔<後山高分40 ~
68 >之間 ) 山壁,有”二次大戰”時陣,日本人倩當地民工,挖鑿留落來的20外座磅空(”防空壕”)遺跡,防空壕,懸約8尺,闊6尺, 7 ~ 8丈深,磅空佮磅空之間,部份有相迵,目前洞口,已經予軍方,責任單位,以鉛線蛇網佮鐵條半封閉.
<朝元寺>,位佇”鄉道37”,電火柱”後山高分71”,離路面約50公尺遠的山邊.遮所在,地號名”後山巖仔(俗稱:舊巖)”,利便佮”朝峰寺”(新巖仔)作區分;當年”使蔣飛瓦”傳奇著是佇遮; 踅uí 寺後壁細山徑,沿山壁 tāu - tāu 仔跁懸,約成公里, thàng”石母乳”(ㄧ線天), 若提遮佮”龍磐峽谷”比並”, “ㄧ線天”的鐘乳石,石筍,石柱的媠,會使講”冠全台”,毌過,若欲論岩壁的險巇抑怪奇, ”ㄧ線天”遠不如”龍磐峽谷”!
<後山高分86>,四箍籬仔地頭,古早號作”山豬蘊(聚集)”,聽地名共意想,佇古早遮猶未開發進前,必定有誠濟山豬,踞踮山洞聚集,遮有一戶姓陳的人家,祖先踮遮徛起,開墾,農耕,欲倚300冬矣! 家傳111件地契古文書,其中包括單語,佮雙語的’番漢契”(新港文書); 遮地契的發現,毌那是”大崗山”地區的大代誌,更加是世界研究台灣史極珍貴的文化財!(毌過,樹大招風,陳家歷代祖先拍拚幾仔代開墾出來的山園,歷經外來殖民政權------清國/日本/KMT政府的觸纏,受盡苦楚,,(請參閱<史 明>先生著<<台灣人四百年史>>/上冊p.426~427------
<1898年”阿公店大虐殺事件”>佇遮事件當中,陳姓家族親人,誅連被殺袂少人).使人感嘆!
<鄉道37>著沿”大崗山”東爿山跤,一直到”崗山路口”(<後山高分116>)遮盡尾,丁字路口有”鄉道14”相接;正手爿,猶原沿崗山跤,踅箍彎向西南,迵”阿公店”(岡山);抑倒手彼爿,路向東,迵牛稠埔,水蛙潭社,往山內貼底入去……………
˙過<番仔田>
uí 高市燕巢區(舊稱”援剿右”),迵田寮區”埤仔尾”,遮節路,長約7公里號作”鄉道38”;”番仔田”社,量約佇這條路中截坎站,遮上明顯的地標,著是一座山峰,一缺(khih)一缺,若斜囥的鋸仔,論真講山愈成(像)大隻雞角仔,頭殼頂的雞髻(kuè),遮四箍籬仔庄民,攏共號作”雞髻山”(雞冠山).踅uí山跤過,一叉迵”滾水沫仔/ kún- tsuí- bok- á ”(外地人共號作”養女湖”),佮” 三八嶺 ”(古早號作”卵葩嶺”).另外一叉,向北爬上崎,到一支電火柱縛細片鐵牌仔頂懸浮印”金山高幹102”遮正手爿叉路,會當上”中寮山”,落”溪州”迵”旗山”;若佇叉路所在落崎,會經過”坎仔跤”,田草埔,埤仔尾,水蛙潭,田寮社…….
<番仔田>,今名”金山仔”,”雞髻(kuè)山”跤,有一間”金山國小”,筆者捌佇這間國小教冊,欲倚六冬,擔任母語教學的工課;詩人林南(黃樹根)老師,早期發表連載清新的詩化散文------<育愛手札>,敢是服務這間國小期間所創作?黃老師uí 師專卒業了後,受分發頭一擺伐上講台------<杏壇初旅>(伊的散文篇名)------第一間服務的學校,著是佇遮; Soo - pai , 對遮附近大細庄頭,我想伊應該嘛是熟律律?!
我細漢出世佇”水蛙潭”社,茨裡雖罔有淡薄仔山園,毌過,因為家父佇庄役場上班,茨裡的穡頭,大部份攏是我阿母佇貿(ba̍uh/全部承接);每年若到咱人7~8月,龍眼成熟,大出的時陣,家家戶戶攏足無閒,茨內大細,攏會齊出動,去園裡鬥跤手------ut(折)龍眼,抑是tiah(摘)龍眼葉;暗頭仔,食飯飽,序大人著緊共折轉來的龍眼重整理,裝(囥)入去籠仔內,疊予四序,準備隔工透早,擔去”援剿右(燕巢)”市仔賣.
講著水蛙潭社,庄民擔龍眼去”援剿右”賣,佇5~60年代,會使講,是規庄的大代誌:透早四點外,天猶暗暝矇,茨邊隔壁相招著起行,大人各擔一擔龍眼,囝仔攑一葩臭蕃油燈火,(鋸一截竹管,1/3面鑿空,細葩燈火,囥內底,頂懸用鉛線勾咧)踮頭前照路.經過埤仔尾,田草埔仔,落坎仔跤,踅幾个uat(彎)了後,到”金山高幹106”,路邊有遺留一片半磚半塗埆的壁堵,遮是”董家古壁”;”跁上一截短崎,來到”金山高幹102”(遮是”高38道” 5公里的所在),倒手爿,是欲上”中寮社”的叉路,若直行進前,落崎,著到”番仔田”(今金山仔)部落矣! 少歇睏,閣起行, 踅uí”雞髻kuè山”跤,閣行7~8分鐘跤兜,來到”金山高幹38”邊仔駁坎離電火柱約20外公尺,nǹg過一坵蓊~蓊的竹抱仔園,邊仔一條野溪流過,溪邊野草雜樹欲幾仔人懸,(現此時遮已改建作”金山3號橋”,是鋼結構摻紅毛塗的橋,向時是一條橋面約4
尺外闊的烏杉仔鐵線橋;行上橋,橋身少寡仔sìm懸 sìm低,行著有淡薄仔膽~膽! 今(tann)! 舊橋早著無看矣!偆兩座橋墩,猶祀/tshāi佇遐!閣行進前,愛閣行過兩條用3~4支大竹仔管,鋪踮塗堤頂懸,(遮屬阿公店水庫頂游集水區,即馬嘛已經改建作鋼鐵摻紅毛塗結構的”金山二號橋”佮”金”山一號橋”矣!
順”金山一號橋”,溪墘向東,有一條尺外闊的田岸路,溯溪入去,約成公里,會當迵”崎蹓水tshiâng”(瀑布).
細細步, liau - liau仔 liam ,行過兩條竹管仔過水橋,閣跁上一條長崎,著到”援剿右”(今燕巢)矣! 彼時陣,天嘛tâu- tâu 仔拍殕光 á !
姓 名: 吳 正 任 現 職: 國中 / 小台語文教師
