我上佮意的戲齣

  吳正任  (國中 / 小台語文教師)

論真講,對於戲劇------無論是布袋戲,歌仔戲,皮猴,電影,抑舞台劇……毌管是傳統抑現代,只要伊藝術性高,風格前衛,創意新款的戲齣,我攏真著迷!

    可能是細漢受著阿媽佮阿母的影響,佇遮濟款無仝表演型式的劇種內底,我特別愛看歌仔戲;我上佮意的戲齣,著是<陳美雲歌劇團>所搬演的<<刺桐花開>>;這齣戲,雖罔是幾仔冬前觀賞過的,毌過,舞台頂,演員的跤步手路,歌仔調,無論是傳統抑新編,甚至是採擷自平埔族的音樂肥底,每一塊戲曲,攏是ui咱跤踏------祖先用血汗開墾,傳湠落來,祖輩佮咱囝孫,世世代代生活的土地,所發出的氣(khuì)絲------遮內底,有骨肉的親情,漢人初到美麗的島嶼,無仝族群,無仝語言,無仝文化的人佮人之間, in按怎交往? in按怎ui對方的身軀頂學習? 才tāu - tāu仔化解衝突?  <唐山公佮平埔媽> 之間,因為互相瞭解,進一步產生信任,達到融合,甚至發自內心的善意…….遮的過程,有親情的葛纏,對家己族群文化偏執所造成的壁牆…….落尾,攏佇愛佮包容之下,<唐山公>的悲情,融化佇西拉雅<平埔媽>,強韌閣自在的性命力內底,轉化作對這片土地的感恩之情…….一段纏綿的愛情故事,有月光,有星芒,有爭執,有諒解,有哀怨,有喟嘆,有不捨,有向望……..遮一切,攏佇歲月的溪河浮沉,到tann,猶原不時佇我的心肝底牽挽,踮我的頭殼內盤踅………

    欲按怎?才會用得講是一齣頂真,成功的戲齣?就歌仔戲劇種來講,當代劇作兼藝評家------曾永義教授,捌提出伊个人的觀點:(A).有深刻的主題思想.(B).情節安排明快合理.(C).劇場舞台顯目 .(D).說唱口白清楚,語氣符合角色身份.(E).音樂講究多元, ”安曲”妥當.(F).演員个人修為,演技不時精進.

    <<刺桐花開>>這齣戲,伊的故事鋪排,發生佇清朝雍乾年間.地點: 台灣屏東阿猴社.主要人物有:女1.<伊那>(平埔族);.女2.尪姨眉烏(伊那之母);女3.芭樂(伊那之妹).男1.<甘國寶>(漢族,偷渡客,因救<把總>之恩,被封為<十總>,掌管<阿猴社>大細事);男2.大巴寧(平埔族,眉烏之子);男3.鄭成(漢族,偷渡客,後來成作國寶屬下);男4.夏豹(“眉烏”牽手)…...其他等.

    佇遮,我欲共<<刺桐花開>>這齣戲,佮專家對著好戲的見解,作一下評比,這部份,抑著是我,為啥物會遮呢仔佮意這齣戲的因端.

   

項 目	一 齣 優 質 精 湛 歌 仔 戲 必 要 條 件
A. 有 深 刻 的 主 題 思 想	˙無仝族群文化(漢人à臺灣平埔族)之間uí 隔閡/對立/排斥/相刣/爭戰……遮中間鋪排異族查埔,查某,男女之間,產生愛意,曲折的悲傷,歡喜,離散.......到互相瞭解,體諒,包容,融(結)合的過程. ˙小我方面:有骨肉之間觀念”代溝”的衝突,經過時間的滔洗世事的創治-tau tau  仔化解?接納?和解,佮互相接納的過程. ˙大我方面:  uí 鄉土之愛,湠闊到國族想像.
B. 情 節 安 排 明 快 合 理	˙”場次”安排如下: 1.      序曲:甘國寶出身背景,呈現彼的年代,社會低層百姓,生活苦況. 2.      渡海: 聽講”埋冤Tâi- uân”錢淹跤目,好討趁,冒著性命風險,藉著官船偷渡,過<烏水溝>,勇闖新天地. 3.      公廨:臺灣平埔族群,官方眼中的”化外之民”------“熟番”上場. 4.      <牽手>:漢人查埔佮平埔族”伊那(女性)”互相愛慕,產生愛意. 5.      曲思:月光暝,偷偷仔約會,唱歌,吟詩傳心意. 6.      訴情:講出心內話,情話綿綿慰相思,終其尾來拍破文化偏執的圍籬. 7.      殺伐:清廷官府,連合”平埔族(熟番)”,攻打”生番(傀儡番)”,雙方茨體被焚燬,人命死傷慘烈.國寶佮伊那經歷征戰中人性的試煉愛情更加堅定不渝. 8.      新生:”伊那”佇爭戰中身受重傷,當時已經身懷六甲(接近臨盆),佇欲過身進前,生落一个查某嬰,象徵”母系社會”,平埔文化得著傳湠.
C. 劇 場 安 排 合 理	˙咱一搬佇講的”劇場”,至少包括a.舞臺.b.觀眾席佮c.後臺. ˙這齣戲,佇高市鳳山大東文化藝術中心搬演,遮所在屬”鏡框式”舞臺型式,座位lîm(近)1000位,適合傳統戲劇搬演. ˙平埔族部落,生活所滯(住)的茨體,外景,草茅,槟榔樹,醃(水)缸,拍獵,掠魚khah仔遮器具,閣有舂臼……..等,攏如實呈現佇舞臺頂. ˙演員服裝的穿插,粧thānn(配飾),攏經過特別設計,毌管是臺灣衫,臺灣褲,抑是平埔族服飾,攏會當tsiâu-tsn̂g呈現戲齣內底,彼个年代各族群無仝的生活樣相. ˙戲齣進行中,每一幕,無論是布景,道具,燈光效果,抑是背景音樂,氣氛的烘托,幫襯,電動機關的操作…….等,劇場的”場面調度”,攏誠流(順)暢四序.
D. 說 唱 口 白 清 楚 語 氣 合 角 色 身 份	(一).佇遮,我欲特別舉出,戲文內底,演技自然唸白佮角色身份足kap   tsiap,而且充滿詼諧,趣味展現的橋段: ˙<剖菸炊救命>:相公”春生”(三花/反串角色),手提一條紗巾,揉過來揉過去,神色緊張,匆pōng衝上場,閣踮眾人面頭前,走tsáu過來,tsáu過去,用官話嚷: ”不好了!不好了!把總生病了…….”(旁白/邊仔隨從,回以”講啥?聽無啦?!”)”春生”隨著用台語改喙(口)講:<把總爺破病矣啦~~~!>. ˙接紲”春生”閣踮眾人面頭前,”數板”唸白,共”把總”因為giàn(鴉片癮發作病甲足嚴重的情狀,用台語唸白:   [伊是一把鼻涕一把涎nuā / 有時發燒有時寒 / 伊是一面踐thún /    閣一面nuá / siak (摔) 面床又閣咬被單 / 規个面仔青損損 / 飯也 袂食茶袂吞 / 目珠強欲袂轉輪 / 恐驚伊一命見閻君].遮咱看會出劇作家創作的才情. ˙全劇上感動我的一幕,是<洗聖俗>這折:熟番佮傀儡番征戰後,伊那強忍規身軀重傷,抱著拄才出世的幼嬰(查某囝),共身軀邊的國寶講:伊欲照族人禮俗,抱幼嬰去溪河<洗聖俗>,這个時陣,舞台頂,天篷垂落一面約7~8尺闊的紅色長布條幅,布條(頭)兩爿,由兩位”麻達”giú”咧,勻勻仔行向伊那身邊(象徵血色河流),伊那伐(跨)入溪水,用<都馬調>,三吩咐,四交代,哀怨唱出,對拄才出世的幼囝,無緣共養飼大漢的不捨------ [……水啊~水~ / 清又~清 / 日日夜夜流不停 / 替我洗去滿身泥濘 / 宛然死了又重生 / 囝(kiánn)啊~囝~ / 我將妳抱在我胸前 / 浸入水中冷又冰 / 望妳以後身體勇勇 / 頭殼硬硬(ting- tīng) / 美麗善良又聰明 / 母啊~母~ / 母疼囝(kiánn) / 未當親手共妳晟 / 叫囝開目詳細看 / 大漢以後~ 毌通袂()記(不要忘記)~妳~ 平埔~阿娘~~~. (P.S, 會記得這齣戲,演到遮,劇場內底,空氣一目睨隨結凍,濟濟觀眾感動甲目屎流,目屎滴,筆者嘛免不了,目屎澹目墘kînn.)
E. 音 樂 曲 調 講 究 多 元	˙這齣戲內底,伊的音樂曲調,應用傳統歌仔調:<串調仔>,<雜唸調>,<白水仙>,<江湖調>,<南光調>,<七字調>,<都馬調>,<吟詩調>,<背詞頭>,<運河哭>,<大哭調>……等. ˙除了傳統歌仔以外,閣採擷或改編自台灣古謠------屏東恆春,滿州,車城……等純樸民謠,庶民小調;親像: <四季春>(恆春民謠),<平埔印象>(台南口埤教會),<平埔獵歌>(台南西拉雅族歌謠),<出公廨寮祈雨歌>(屏東西拉雅族儀式歌謠),<Tavulo>,<呵呀嘿>(高雄西拉雅族儀式歌謠),<懷念故鄉>(宜蘭葛嗎蘭民歌改編),<唸農作物之歌>(高雄西拉雅民歌<Talivunvun>改編),<有若影>(高雄西拉雅民歌改編),<守牛調>,<牛尾絆>(屏東滿州鄉民歌)…… ˙這齣戲,戲曲的運用,毌管伊的取材,抑改編創新,攏展現多元,予人耳目一新.

     

講著演員的演技,是毌是不斷精進?若干焦觀賞一場演出,是無法度評鑑的,因為每一齣戲,角色設定,演員為著欲型塑分配角色,人物性格身份,無法度仝時展現完全無仝的角色人物.Soo  -  pai ,除非咱有針對單一個別演員,作3冬,抑5冬的培訓計劃,持續追蹤考核;毌過,作為一個敬業的演員,必然會自我鞭策,惕勵家己,不斷自我精進.

     這齣戲的主題思想,有誠大部份,是欲呈現漢人佮台灣平埔族之間,異文化的差異偏執;劇作家透過男/女主角------甘國寶佮伊那交往,表露愛意,互訴衷情,甚至國寶向伊那提出”求婚”(兩人做”牽手”),藉著劇情發展,透過男/女雙方的對話一一浮現.佇遮,我共番(平埔族)/漢之間,文化歧異有踮戲齣頂頭表達,吐露的情節,概要列佇下面:

項 次	番 (平埔 / 西拉雅)族文化	漢   族   文    化	附  註
1	語言使用:平埔族語	華語/閩南語/後期台語
2	信仰:阿立祖	媽祖 / 觀音佛祖
3	信仰中心:公廨	宮 / 廟 / 祠堂 / 大廳
4	祭品:檳榔 / 青 / 野花	牲禮/果子/燒香/燒金銀紙
5	跋檳榔桮 / 以鳥音占卜	跋杯
6	哺檳榔	吸食鴉片/菸/輔具:鼻煙壺
7	服飾:獸衣/樹皮.後期:麻布.	台灣衫/台灣褲/布帶縛褲
8	褪赤跤(打赤腳)	男:草鞋/功夫鞋.女:縛跤	漢女:纏足.
9	母系社會(生女”有趁”生男”無趁”(重女輕男)	父系社會:重男輕女.
10	婚姻:男方嫁去(滯/住)女方茨(招贅 / 漢人謂之”招翁”)	女方嫁(滯/住)去男方茨,女方須嚴守<三從四德>.	女冠夫性
11	缺性觀念/較開放/袂節育	重禮教/後期”一夫一妻”制
12	嬰仔出世抱去溪河洗<聖俗>	用面盆承水洗靜.
13	主食:蕃薯 / 芋頭 / 小米 狩獵:野豬 /鹿/其他鳥獸.	米食 /耕種五穀/飼養家畜
14	茨(房屋): 竹茨/草茨/石板茨.	草茨/土埆茨/磚瓦茨…….
15	文教:缺	四書五經/儒/道/佛思想….
16	交通工具: 牛車.	牛車
17	醫療:”尪姨”替族人治病.	求神問卜/大夫醫生食藥
18	祭儀: 哮海 /豐年祭/捕魚祭/祈雨祭	祭祖/作醮(祈福)/神明聖誕.
19	娛樂: 善歌舞 / 跳戲.	演戲 / 酬神 / 人神共歡.
20	歲時曆:無四時概念,以<刺桐花開>為一度. (”漢人”1冬)	日出日落(日) /月圓月缺(月)/一年四季為1冬(即是: 今年冬至算起到下一擺冬至日為1冬).作穡人以<農民曆>一年二十四節氣作”曆算”標準.

     <<刺桐花開>>,是台灣戲劇史上,第一齣共平埔族文化,搬上舞台頂公演的<歌仔戲>! 久長以來,平埔族文化,因為被強勢漢化,已經強欲斷氣(khuì )矣!由於劇作家,演員,佮編曲家,劇場工作人員的通力合作,才會當共這齣傳統戲劇,注入新的時代思想佮精神,十全 (tsa̍p- tsn̂g )展現台灣人,釘根佇成長的土地,佮土地牽挽作伙,按怎剝著剝袂開的感情!

     <<刺桐花開>>! 是我上佮意的一齣戲!永遠的平埔˙西拉雅之愛!永遠的台灣之愛!