隱身佇杏林 ê 詩人------陳國群醫師

隱身佇杏林　ê　詩人------陳國群醫師

                ------導讀陳醫師臺語新詩作品兩首　

                                                                                                            吳正任

[話頭]

    當代臺語詩壇,講著陳國群醫師,假若誠少人聽過,抑是讀著伊 ê 臺語詩作,無毋著,因為到今(tann),陳醫師的作品猶毋捌佇臺語文學雜誌發表過,Soo-pai,少人知,雖罔按爾,毋過,陳醫師 ê 詩作,根據伊本人所吐露,臺語詩創作,已經達到2~300首,這份創作熱情佮數量,值得咱敬佩!筆者讀過詩人 ê 濟濟詩作,充滿著臺灣歷史感,佮對成長土地 ê 深情;另外,佇個人生活內底,誠濟抒發小我感情 ê作品,印證著庶民文學,來自常民生活,這項論點,而且,就伊 ê作品來看,佇大我方面,充滿著臺灣國族想像,佮鄉土情味,誠值得來推薦予臺語詩壇,佮讀者大眾認捌.

一.認捌詩人陳國群醫師 (1947/5/15~ 2009/06/29 )

   陳國群醫師,1947/5/15,出世佇高雄市岡山區(鎮)潭底里,求學過程,嘉興國校,臺南一中,高雄醫學院卒業,取得醫師執照了後,執業小兒科;詩人佇 2007/7/28自費出版彼本------<<臺語新詩圖文展>>,詩集厚32頁,內底收59首短詩,而且每一首詩,攏有附陳醫師親手繪的水墨畫一幅,佇這本袖珍本詩畫集,封面內話頭(序)裡,伊有按爾提起:[(華語)2003年8月9日,禮拜六,我隨興驅車,前往美濃,順道拜訪鐵民兄,臨行,鐵民兄一句,半疑惑,與半激勵的話:” 我們都以客語寫詩,你為什麼不以臺語寫詩?我當時不假思索的回答他:怕甚麼?今天回去,我就寫!也因為這句話,讓我的臺語新詩的創作,一直沒有中斷,回首這幾年來,陸陸續續,總共完成幾百首……..]; uì 遮咱會當瞭解, 陳醫師,伊從事臺語詩創作　ê　心路歷程; 2005年跤兜,陳醫師應基督教岡山長老教會,附設松年大學,聘請擔任臺語教學課程,誠受學員歡迎.

二.就<<臺語新詩圖文展>>詩畫集內底59首詩創作內容題材作一个簡要歸類: 

類    別	篇                                名	備   註
1.地誌˙特產	<古坑咖啡>(1.)/<大壩尖山走一回>(6)/<東海岸>(10)/<畚箕湖>(14)/<塔山雲海>(24)/<六龜火焰山>(29)/
2.自喻(自況)	<作詩>(1.)/<蓮花>(2)/<雨中花>(5.)/<食老>(14)/<蓮心>(19)/<蟬>(21)/<寒夜>(22)/<路螺>(26)/
3.自然˙生態	<竹抱仔>(9)/<瀑布>(20)/<稻穗>(18)/
4.生活˙寄情	<彈琴>(2)/<花開花謝>(10)<看山嘸是山>(11)/<寂寞無儂知>(16)/<種瓜>(17 )/<鹽埕之歌>(23)/<日頭跁起>(24)/<蝶戀花>(27)/<落絮無聲>(28)/<偷得浮生半日閒>(30)/
5.家園˙土地 之愛	<白鷺鷥之歌>(3)/<哭海>(4)/<返家十萬里>(5)/<一隻鳥仔號啾啾(6)/<愛來留臺灣>(16)/<雁南飛>(26)/<蘭嶼兮等待>(28)/
6.鄉野˙寫真	<割稻>(7)/<深山林內>(15)/<農村>(17)/<緣定>(18)/<溪邊行>(25)/<暮色歸途>(30)/
7.勵 志	<兄弟>(7)/<困苦愛忍耐>(8)/<一山比一山遠>(12)/<苦瓜>(13)/<風雨>(13)/<團結>(19)/<山遠>(25)/<天行健>(29)/
8.人物˙典範	<鍾理和>(22)/
9.傷逝˙哀怨˙嘲諷˙其他	<好風采>(8)/<抽象畫>(9)/<阮姐仔佇市內>(11)/<指引>(12)/<閃電>(15)/<蕃薯囝˙蕃薯孫>(20)/<人生如戲>(21)/<十八姑娘一蕾花>(23)/<鏡中的阮>(27)./<黯中來鬥爭>(26)/

[ 說   明 ]: 篇名後,括弧內數字,代表該篇作品,出現佇冊內頁數.

三.作品導讀

<其 1>.  < 作  詩 > (摘自<< 臺語新詩圖文展>>P.1, 作者:陳國群).

          Tsò -  si

           作   詩

        Jī   bat   bô   sann   jī

        字    捌   無    三     字

        À   siūnn   beh   tsò   si

        也    想    欲    作    詩

        Khan - khan   kui   tuā   tui

         牽   牽    規    大    堆

        Suà   kà   ka – kī   pa̍k   sí – sí

        紲    共   家  己  縛   死   死

<導  讀 >

    咱讀完這首詩,翻頭看陳醫師,踮伊自費出版<<臺語新詩圖文展>>這本詩/畫集封面內頁,詩人家己所寫話頭(序),有按爾提起:[……(華語)因為,我深深體會,台語都講不好,還要以台語寫詩,自是難上加難,要講好台語,要寫出道地的台語詩,一定要用台語來思考,不能經由翻譯的過程,否則,味道都走樣了! ];因為作者有這層體會,才會用”蜘蛛更kenn絲”來作比喻,伊按爾警惕家己: [字 / 識bat無三字 / 也想欲作絲 / 牽牽規大堆 / 紲共家己縛死死]

    作者謙虛講,家己捌無三字,嘛毌知按怎構詞,台語句法,也想欲佮人來作詩,落尾煞將家己縛死死,有”作繭自縛”-------家己所作的代誌,煞來害著家己的意思.

    佇這首詩內底,作者用蜘蛛,來借喻家己, 佇遮, ”絲”佮”詩”音仝, ”更絲”成網””;作詩”詩句連綴成篇,完成一首作品,攏是一款”創作”,抑”更絲”,若經緯無順理路,必然葛葛纏,路尾,煞共出路封死,縛死家己;講著詩 ê 創作,詩句佮詩句之間,愛有隱而不顯 ê 關聯性,前後之間 ê 脈絡,聲氣,愛相通,予規首詩,充滿情趣,韻味,甚至創作出反常合道的新奇.

<其2 ><指  引> (出處仝上P.12,作者:陳國群).

           Tsí    ín

           指    引 

       Tuā – tō- kong /  Ma-  tsóo - pô    

       大   道   公  /   媽  祖   婆

      Kuan -  sè – im   kah  Hu̍t –  tô

       觀   世   音   佮   佛   陀

      Sam –  kài – kong  /  Tsóng  tshiánn Tsiūnn  âng  toh

        三   界   公   /   總     請   上      紅   桌

        Siū  guá  it   pài  /   thiann  guá   tō

        受   我’   一   拜  /   聽     我   道

        Guán  í – king  /  long  siūnn  bô

        阮   已   經  /   攏    想    無

        Pue  lâi  phóng  khí  /  pue  lâi  phah  tó

        茭   來   捧   起   /   茭   來   拍  倒

         Lí   ê    tsí – sī /  Guán tio̍h  án  tsuánn  tsò

        你   兮   指   示  /  阮   就   按   怎    做

< 導  讀 >.

            遮是一首呼告的詩,沿汰(一面)吟唸,目珠前,親像出現一位穿百衲衣的老阿婆,抑是一位悲苦的散鄉人,來到廟宇的神案前,呼告眾神,來庇佑善男信女;百業蕭條,五穀欠收,事業失敗,抑是厝裡的親人久病無藥醫,抑若無,敢會是拄著世間不公不義的凌遲……哽佇心內的不平佮冤屈,無地解,無地投,只好來到廟裡博柸,請神明作主:

    一開始, 著呼告眾神: 大道公 / 媽祖婆 / 觀世音佮佛陀 / 三界公……..

總請(眾神) / 上紅卓(紅架桌) / 受我一拜 / 聽我道 / 阮已經 / 攏想無……..

(叫天天不應,叫地地無靈 ) 阮已經想無步矣! 只好來到神殿廟庭,祈求眾神,報阮一條生路,雙手捧著聖柸,喙裡唸唸有辭,若答應弟子所求,請賜聖柸,來應允…….只要神明您的指引,阮攏毋敢怠慢,嘛毌敢推辭,恁若按怎講,阮著按怎做……..

    這首詩,正正印證庶民文學,來自常民生活,伊上感動人的所在,著是uì民間取材,以庶民平素樸質的口語,寫一般庶民,到了”進無步,退無路”的遭遇佮情境,雖罔,依近平鋪直敘的筆調,毋過,感情深落,呈顯出台灣民間社會的現實境遇,充滿鄉土情味,感人至深.

作者姓名: 吳     正     任

職    業: 國中 / 小台語文教師

住    址: 高雄市岡山區後紅路37巷8弄80號

E  - mail:  tsingjim1127@yahoo.com.tw