導讀<<詩寫臺灣>>詩兩首

                    吳正任

     <<詩寫臺灣>>四句小詩,作者呂自揚先生,本名呂豐民,1944年,出世佇原高雄縣田寮鄉七星村南勢湖(澳)部落.(今行政區,改隸高雄市田寮區七星里).呂先生就學台南師範,卒業後,佇國小擔任小學教員;後來,繼續進入高師大修讀,卒業後轉任高雄高工擔任國文教師;呂老師佇1979年,創辦經營”河畔出版社”,因緣於伊家己對古典詩詞的熱愛,選編大量伊家己意愛的古典文學經典名句,加上伊對遮每一句詩詞的個人析賞心得, 2 ~ 30冬來,出版誠濟本遮方面的系列作品.相信佇5,~,60年代,這層中學生,佇求學的階段,濟少攏讀過,抑接觸過呂老師,這方面的著作;準講毌捌(不曾)見過呂老師,無,嘛捌聽過伊的字姓;我來簡單列舉,呂老師的創作其中一本------<<歷代詩詞名句析賞探源>>,聽講再版閣再版,銷量突破幾仔萬本,可見讀者的層面有偌闊.

    年歲漸長,呂老師自教職退休了後,落葉歸根的初衷,愈來愈浮顯,專心致意安身立命的所在, Uí (從)2005年起,著一心一意,共(將)創作的心思,囥踮成長的土地,為母土------臺灣的自然,山水,溪河,人物,草木,地誌……描繪書寫.十外冬來,伊完成家己自創體例,以”四句小詩”(類<七字仔>)的形式,創作幾仔十首, 呂老師共(將)遮系列的作品,輯成<<詩寫臺灣>>出版;題材寬闊,佇寫實佮想像的層面,呈現時代風貌,表現族群的感情,”以詩記史/以風物入詩”,為時代作見證.

    <<詩寫臺灣>>內底的詩作,根據作者本人透露,會使得用華語吟唸,嘛會使得用”臺語”吟唸,真實呈現生活踮遮塊土地頂頭的人文,生態,予讀者感受著詩人對土地的關照,佮詩作字句,處處攏透露出厚~厚~厚的”臺灣心˙鄉土情”.

    <<詩寫臺灣>>,內底收70首<四句小詩>,另外,有摻55篇民俗趣味故事,佇遮,我欲來導讀<<詩寫臺灣>>內底的詩作兩首:

<其1>.  Tó  -  koo   tshian   -   kóo   put    ti    liân

        島    孤     千         古    不    知     年

 Thian -  guē  phiau  -   lâi   Phôo  -  Gâ   suân

       天     外    漂         來    葡      牙     船

 Hok  -  Ní  -  Môo  -  Sa   it   -   sing   hám

       福     爾    摩       沙   一       聲    喊

 Sè  -   kài   tē   -   tôo   iú     Tâi   -   Uân.

 世     界    地       圖   有     臺      灣

[導    讀]  ------

    西元1544年,葡萄牙人佇海上駛船,欲向北,往日本國航行途中,經過一跡地圖未標示的島嶼,船員看見遠遠的島上,樹木青翠,山巒秀麗,誠歡喜,忍袂稠,從而大聲喊喝:

ILHA   FORMOSA . 自按爾,彼塊美麗的島嶼,從此有了字姓,親像幼嬰出世時陣,大力啼哭一聲仝款,自彼時了後,世界地圖,開始出現(畫出並標記)------  ILHA   FORMOSA (福爾摩沙).

     這首詩,氣勢磅礡,親像盤古開天,天地為之震撼!臺灣地位確立,讀著規身軀袂輸注入滿滿的元氣,有身為臺灣人的光榮佮驕傲!

就”大我”層面來看------”詩的想像˙臺灣的想像”------這首詩,會用得講是這本詩集內底予讀者眼界大開的經典之作!

<其2>.  Ke   -   tsāi   Tshân  -  liâu   OO -  suann   io

        家      在      田       寮     烏     山   腰

        Be     tho̍k  -  su   lâi   lōo   -   tôo   iâu          

    欲    讀    書   來    路      途    遙     

    Peh  -  suann    lo̍h  -  kiā   thǹg   -   tshiah   -   khia   

        跁       山     落      崎     褪         赤        跤

Siōng   kiann   gū   khe   kiânn   tiàu  -  kiô

  上       驚     遇    溪     行     吊     橋

(第2首我以<臺灣羅馬字>文/白濫摻,混合標音)

[導    讀] ------

    頭前咱有提起,呂老師細漢時陣的徛家,滯佇”中寮山”(今高市田寮區佮旗山區交界)西爿面山跤,一跡號作<南勢湖/澳>,住民約有2~30戶的農庄細部落; 4 ~ 50年代,若欲入學讀冊,著愛行單程5公里,來回一逝 (tsuā)將近欲倚uá成10公里的山路, UÍ  伊兜出發,到”學仔”,愛經過3條鉛線橋(“南勢湖社”迵隔壁庄à ”大坵園”社à迵水蛙潭社à迵”田寮社”才會到學仔/ o – á),誠拄好!遮3~4个山區部落,有一條發源自<中寮山>的溪流.(頂面箭頭的所在,兩庄隔界,攏被這條山溪隔開nǹg過),遮3條鉛線橋,閣攏是年久失修,破破爛爛,橋面鋪一片尺外闊的柴枋,有的所在,枋仔已經脫落,必須著愛雙手gīm 牢橋身,雙爿鐵線,跤踏踮幼佮細的圓捲索,細步細步伐,尤其是水蛙潭社à迵”田寮社”這截,溪面闊百外公尺,行上破爛的橋面,風吹來,搖搖幌幌,半弧圓拱的中央這節,橋身 sìm 懸 sìm低,較無膽的學生囝仔,早著哀爸叫母矣!偏偏有愛作譎/gi̍k 的查埔囡仔,雙手踮橋雙爿的鉛線,朝工用跤底力,出力搖,共橋身 sìm 懸 sìm 低,較無膽的學生伴,三魂六魄早著飛去到十三天外矣!若拄著落雨天,白崩棚,海銀塗kut-  niú – siûnn ,讀冊囝仔,褪赤跤,毌管穿長褲,抑短褲截仔,行無三伐步,著tshu倒, kha – tshng -  phué 定著膏滿漉糊糜,抑兩支跤盤,袂輸若穿一雙天然的靴管咧!

     會記得,有一冬,透風颱,兼作大水,田寮溪,溪水一目睨漲懸,溪水汹湧,一爿橋墩,早著毌知予大水沖倒,流去佇佗位矣?!放學了後,溪水猶原抵到學生囡仔的胸坎懸,天嘛漸漸暗落來,無ta – uâ , 只好出動全校教師,徛踮汹湧急流的溪中央,一跤步,徛一个,手牽手,護送學生囡仔,平安過溪!這首詩上尾句------<上驚遇溪行吊橋>------著是描寫頂懸這段,若想起行山區的鉛線橋,心肝頭著 pī- pho̍k – tshái ,驚甲規身驅汗(kuānn) !袂輸一場撥袂離的惡夢……….

    對仝款出世佇惡地海銀塗大漢的山內囡仔來講,讀這首詩,特別有味,窮實咱(我)嘛是經歷過佮作者仝款的生活環境, soo - pai 感觸特別深!

    總是,這本富涵鄉土情味,優質的詩集,誠值得推薦予逐家.

姓        名: 吳     正     任    

現        職: 國中/小台語文教師.