 |
| 蘇俊明醫師提供 |
彼時˙這時 ------ 走揣青春的影跡
搬來岡山徛已經五十外冬à!徙來即馬蹛的所在嘛超過三十外冬à!這兩句話初聽起來感覺有ㄧ點仔怪怪?其實,伊並無矛盾的所在,頭前彼句的意思是佇講: uí 阮姊弟仔出外讀冊 “suè – tshù 徛”到今(tann),後壁這句是咧講:阮結婚了後,成立小家庭,另外買茨,徙來這馬蹛的時站; uí 踮異鄉讀冊的中學時代算起,佇鎮內蹛過”頂後紅”(碧紅里)佮”下(ē)後紅”(後紅里);阮初次來到鎮上徛起的第一个所在------是即馬”碧紅里”站東街62號”,佮”頂紅街42號”遮箍籬仔,後來徙來”維仁路8號”(今”慈惠堂”址旁);兩冬了後,徙來”維仁路130號”;閣來是:大埕街80號”;路尾閣徙來”維仁路86號”;頂面遮所在,是我佮二姊離開家鄉,出外讀冊六冬(初中/高中求學時代) suè- tshù 徛(khiā)過的所在;後來,阮序大人買茨佇”成功路”,等到我tshuā某生囝,組立小家庭,家己買茨,才定居佇即馬蹛的所在------Āu - âng - lí ; “岡山”已經成作我的第二故鄉矣!
佇岡山蹛超過半世紀,遮爾濟冬來------中學階段,較迭行踏的街仔路------是舊岡山路,岡燕路,壽天路”平和路”(中街)佮舊菜市仔;後來,新市場開始營運了後,舊菜市仔沒落,布店,肉砧,菜架仔,差不多攏收離離矣!新”岡山南北路”開通,民國82年10月25? (抑28?)火車站徙向東爿面(後紅里)了後,新站四箍籬仔,大樓建物,一直起造,現此時捷運”南岡山”車站頭前,餐廳,秀泰生活電影城,健身運動中心, UNIQLO , NET 服裝百貨進駐……予人耳目一新!接紲,”高捷”向北延伸,按算2004年欲通車到這馬火車站前(捷運岡山站),岡山整个發展,予人充滿期待!
˙ ˙ ˙
岡山舊火車頭(驛站),早著已經拆除,舊站東爿面,號作”平和東街”,西爿面號作”平和路”(抑著是在地人講的”中街”),我這馬著自東殂(tsoo)西,來一逝(tsuā)”平和路”(中街)的懷舊之旅------”平和路”10號,是有七十外冬歷史的”心心食堂”,倒手(東)爿是”鐵路巷”,向東20公尺,著是舊火車頭;向時附近鄉鎮的學生,若欲去高雄抑台南讀冊,通學坐火車上利便,我二姊,初中讀”橋頭初中”,透早著是行路來車頭坐火車去學校;”心心食堂”,歷史悠久,以日本料理的食食(tsia̍h-si̍t)上出名,我看伊店門伸頂,掛一塊柴匾 khang – páng (招牌),刻民國三十七年十一月吉置,是”莊三德製材工廠”贈;若照按爾算來,已經有七十三冬的歷史矣!我向第三代頭家娘探詢,閣較早,飯桌仔時代,未掛khang- páng 著開始賣算在內,年閣應該愛加幾仔冬,論真講,應該是日治時代尾期著開業矣!
Tsànn過岡山路,倒手爿第一間建物,這馬是”一銀岡山分行”,伊大門向”岡山路”(現此時門牌號是岡山路275號);我讀初一時陣,遮是一間歐式(融合和風)的舊建築,門面誠氣派古典,烏tòo紅的磚面,玻璃窗仔門,窗櫺像漆暗綠色,門埕一个細圓環,箍內蓋成種兩欉足大蓩(bôo)的鐵樹,閣有懸懸的”美國松”(落羽松)佮扁柏,造景優雅;伊倒爿屬”平和路”,向時平和路這爿,種一排粿葉樹有涼蔭,排七~八台載貨的li – á – khah(載貨三輪車),有時嘛停幾台牚(nê)帆布的人力三輪車,佇等候人客叫車,彼陣計程車猶無普徧,會記得干那客運站前,佮舊驛(車)頭頭前各一間計程車行.
No. 30 (“平和路”門牌號碼,uí 岡山路行入來,正爿雙號,倒手爿單號):遮向時是一間餅店------<合成珍>,頭家吳坤城先生,是早年uí 田寮七星村水蛙潭(筆者鄉親),移居遷徙來的,吳桑個性謙和,腹腸闊,定默默行善,是虔誠佛教徒!量約佇( tī/在)民國49~50年間,著贈送一台烏白(彼陣猶未有彩色)特大型電視機,予水蛙潭社區鄉親,收看節目; 彼時山內貼底山區,有電視通看,是一件偌稀罕閣轟動的大代誌咧!筆者才讀國校二年抑三年,暗時嘛走去跔踮電視機頭前,看”群星會”,看”五粒燈”,看連續劇------“野柳戀夢”,看外國節目------<蓬車英雄傳>,<斷刀上尉>------印象上深的是:台灣野球隊出征<威廉波特>,參加世界青少野球比賽電視轉播,規庄老歲少年 á ,攏齊(tsiâu)出動,半暝守(tsiú)佇電視機頭前,為台灣子弟加油,彼款熱頭,有影無法度形容!逐擺若擊出一支HOME- RUN, 哇!規个庄頭袂輸若湔熱的油鼎規个滾絞(尬)起來!尤其是提著世界冠軍的時陣,炮仔聲隨著 pin – pin piàng - piàng 響連天!放袂煞!------閣雄雄想著,我訂婚,納采的時,送定用的糖含,糖霜,冬瓜……等禮品著是來”合成珍”採買的.
No.32------向時,遮是一間hip相館”清影”,諒必有足濟學生來遮留落青澀的面貌,有的戴頭殼頂凹(nah)三漯(lap)的草帽仔,抑是仝款凹三漯的塑膠童軍帽仔,甚至是查埔高中生,戴”大盤帽”,查某學生戴卡其色的船型帽;穿大學服,學士服的大學生,料必嘛袂少攏捌(曾經)來遮,留落in青春的形影,貼踮學生證,抑是囥踮畢業同學錄頂懸!
No.40------遮是一間拍金仔店------“金正山銀樓”,佮對街斜對面相向(ǹg) No.49嘛是”金正山銀樓;”仝爿No.77, 是”金一山銀樓”; No.91是”金振昌銀樓”;No.119是”金寶玉銀樓”;從事玉器,集郵,字畫,茶壺……買賣; No.146是”金永珍珠寶銀樓”;平和路這段,是銀樓誠集中的所在,會記得訂盟,納采時,捌佮二姊,來”金玉山銀樓”買手指佮袚錬(pua̍t - liān).
No.42.------高耀倉?病院舊住所,我會記得細漢讀國小坎站,像捌拄著(曾遇到過)我年長高齡的阿嬤,身體無爽快,佮序大人來岡山,搬請高醫師外診,去山內替阿嬤看病.
No.74------向時是”道明百貨行”,這馬是一間目鏡鐘錶行;抑”道明”已經徙去平和路(中街)191號路尾矣!
No.79------“太吉西藥房”,位佇”民生街”佮”平和路”相接的三角湧,建築外觀是磨米國石仔的兩層樓仔,向時,綜合多元的藥妝超市,猶未出現進前,太吉西藥房會使得算鎮上蓋tshiann – iānn,因為,遮有電台”拉吉歐”(RADIO)廣告,寄賣的藥品,名聲放送較透,迵(thàng)附近鄉鎮;我讀初中的時,捌佇(曾)岡山路303巷50號遐suè – tshù – khiā. uí 蹛的所在,行出彼條巷仔,正爿是1間米絞,倒爿是1間火炭行,直直行進前,對著”太吉西藥房”的正門,磨米國石仔的柱仔,當時,倚uá 柱仔一角,有稅尪仔冊擔,暗時我捌(曾)租劉興欽先生的漫畫冊------<阿三哥與大嬸婆>,<丁老師>…….<王子半月刊>……..等轉來看;遮彎倒爿是”民生街”,民生街七號是<太原診所>;歐洲式建築誠氣派,佇當時來講,可能算鎮內徛家(khiā- ke)上懸的建築,內外裝潢古典氣派,大門外壁細塊柴匾寫明王愛育(可能是第1代?),王仁榮(第2代?)字姓頂下列排;小兒科,外科;毋知這馬敢猶閣有咧看診否?
民生街2~11號,遮一條無偌闊的過水巷路,算是舊市仔東南角落,向(嚮)時有一對翁仔某,聽講是 uí “新化”搬來遮徛,做賣醬(料)菜的生理; in的攤車頂懸角落,縛一个鈴鐺,醬菜車搡過,聽著叮叮噹噹的聲,附近的居民著倚來,買醬料配糜,逐早仔攏差不多仝彼个時間,袂輸佇提醒學生囡仔,該食早頓通好出門去讀冊矣!;醬料店較內底面,有一个生做誠福泰的婦仁人,顧一擔賣燒湯的------客家好食物(tsia̍h - mi̍h)------“面布粿”(粄條),生理不止仔 ka - ia̍h ,聽講伊是台灣新婦日本婆!
No.61~4 .這條細條巷仔入去,是舊市仔,外緣有兩逝(tsuā)布莊;遠(鄉)親三陵兄嘛佇遮開一間布店,大姊欲出嫁進前,捌(曾)來遮剪布,我嘛捌來遮鉸上等的卡其布,提去予這馬”高苑幼稚園”的老頭家娘,做一軀卡其衫,卡其長褲;我猶會記得,欲做衫褲進前,愛先量身軀,彼當時,我是一个15~6歲的少年家媠仔(ke - thô - á),愛穿較合軀(ha̍h - su)的服裝,林家老頭家娘(裁縫師),著共阮姊仔講: 衫褲較闊咧,較大範(pān)!卡其褲做好, hiannh轉來試穿,有影!褲管闊 lang – lang,遰念是名師剪裁,只好將就,學校規定畢業旅行愛穿校服,我著共穿去參加初中的環島畢業旅行!
No.83這條巷仔入口,有一位”跤”各樣的歐吉桑,以刻橡乳印仔,佮角印仔營生,邊仔一間拍鎖匙的五金行,攏捌(曾)共in交關;隔兩~三間店面量約是No.85? 是一間皮鞋店,店名號做”廣進”,店門口縛一隻歹沖沖的大狼狗,內底ㄧ位八十外歲的阿婆顧店,這間店,用事先錄音好勢的,細台”放音機”, uí 早時開店到暗時歇睏(關店),規工放送無停,我會記得,伊的廣告話句是按爾:來~!來~!來~喔!欲買皮鞋著對遮來喔!......毋通行過頭,抑毋通行無夠,請來”廣進皮鞋店”參觀指教!…….會記得我嘛捌(曾)來”廣進”買過烏色圓頭的學生皮鞋.
No.110這間店號-----“述古堂”,是一間中藥行,看伊門楣頂懸,彼塊柴匾仔,雖罔無偌大塊,毋過,應該欲成百冬矣!外面的門枋,佮內底的數櫃(siàu-kuīĪ),囥漢藥的棧屜仔……攏 lù 甲烏金矣!料必年閣專門久矣!......
No.111 遮間店,是”好朋友繡學號”------毋管在地,抑是岡山附近鄉鎮,讀過冊(小學,中學……)抑穿過校服的學生,必定攏捌(曾)紮校服來遮報到,共家己的”名”佮”學號”,繡踮你(妳)的校衫頂懸,逐工出門讀冊,攏佮你(妳)形影不離,成做真真正正的”好朋友”!
No.120遮是”鐵鳥hip相館”,本文頭節進前有提起,佇”平和路”路口,有一間老店”清影hip相館”, 5~60年代,”清影”當流行,後來,離”清影”無蓋遠阆5~6間店面,佇6~70年代竄起來,應該嘛有誠濟學生囝仔,佇”鐵鳥”留落青春的形影!(民國54年,我國校畢業,斯當時Tshân - liâu 國校,畢業師/生團體相,著是倩(tshiànn/雇)”鐵鳥”第一代老師傅,外(聘)拍來學校hip大張團體合影的畢業相!後來”鐵鳥”徙來佇平和路120號經營;1980~年代,強調快速洗相,15分鐘交件的”千友hip相館”,嘛佇”壽天路”徛起;遮三間相館,會當算是鎮內到tann,歷史上久,口碑上好的前三名!(毋過”,清影”佇足早以前著結束營業矣!)
向前約15公尺,倒手爿是”仁安街”,佮平和路相接,成作丁字路;仁安街18號,向時是陳小兒科,陳醫師是我多桑公學校同窗,這馬若健在,嘛欲成百歲矣!對面是”文凱婦產科”,現此時主人家共樓跤改成<文凱醫物館>,對外開放參觀.
No.147 這間是”王大吉禮品店”,專門販賣獎杯,銀盤,紀念品,鋼筆……等文具.閣有代寫大字(書法),鉸字,楹聯…..等.過ㄧ間店面,遮是“維仁路”佮平和路交叉成無偌闊的十字路,維仁路倒手爿約30公尺,抑著是佇這馬量約131號所在?向(嚮)時是ㄧ間旅社------“蓬萊旅社”,會記得,國小畢業彼年七月,導師tshuā(帶)阮十外个畢業生,來岡山參加”初中聯考”,因為考場踮岡山中學(今岡山高中),旅社離考場較近,考前ㄧ工,阮師生著投宿踮”蓬萊旅社”過暝.
No.185我的中學時代,鎮裡冊局,間隔(規模)較大,冊架頂”文學冊”佮學生參考冊量上濟,應該算是”壽天路”的””文祥冊局”,其他幾間,間隔較細的冊局,攏以賣”參考冊”抑”文具”為主;平和路185號遮,這間冊局號做”文進堂”,伊的間格雖然無闊,毋過,特色是店門口,平面排的是成十款的tóng – guā- tsa̍p – tsì;我高中的母校,位佇(tī/在)岡山公園西爿(旁),下晡放學,有時我會朝工行平和路轉去蹛的所在,經過”文進堂”,我會停落來,掀看遐的雜誌; 1978/1我的第1本華語散文集------<<白雲飄飄>>,由”台北彩虹出版社”出版,岡山這兩間冊局的冊架頂頭,攏有排一落,大約三十外本<彩虹叢書>,其中包括拙著,彼本散文集,是我20歲前後所寫,無足成熟的青澀作品; 有時經過這兩間冊局,我會彎入去,看我的頭siunn仔,有賣出去否?抑是猶閣排佇冊架頂?
東西向的”平和路”(中街),路尾佮東西uat(彎)南北向的”壽天路”相交叉,形成十字路;倒爿3~50公尺,是”岡山大戲園”佮”岡山戲園”,做兵放假日,定會來遮,看”勞軍電影”,消磨歇睏的時間;若tsánn(截/穿越)過壽天路直行,這馬有兩叉路,原有的舊路是”警悟巷”,較闊這條是後來才新開的”公園路”;咱行入這條較隘(狹),較有古早味的”警悟巷”,看路名想像,略約知影,倒手爿是”警悟寺”,抑正手爿巷仔頭,一間雙向(hiàng)的低kē茨,一面向”壽天路”,門牌編88之1號;側面這爿是”警悟巷1號”,頭間遮向(嚮)時是一間糊紙店,中學時代,經過遮,攏會看著一位頭毛佮喙鬚攏半烏白的老者,坐踮低kē椅頭仔,頭ànn-ànn,手提竹篾仔,注心佇糊紙厝,編鼓仔燈(燈籠);我讀中學時代,一年內底,拄著國家重要節慶,攏會辦一兩擺,暝時遊行(遊街)活動,每一班老師會指定幾組集體創作一只鼓仔燈,有學生家己做袂出來,只好來遮倩(tshiànn/雇)糊紙老師傅代工,作一寡較細型,適合(利便)學生囡仔手摜咧遊行,趣味的動物造型燈籠.
閣進前,來到警悟巷6之1佮之2,遮門面誠闊,相連兩間平房,以早遮是”清風撞球場(房)”;予我想起高二導師------輩份足懸,偏名號做”師公”(老師的學生的學生,三代攏學成,轉來母校做老師)------的徐老師,歇睏時間,定看伊穿一軀正裝,頭戴拍鳥帽仔,跤穿一雙擦甲烏金發光的皮鞋,有時thuh一支柺仔,風流倜儻,佇遮出入,消磨單身寂寞的時間!
Uat(彎)過來”公園路”,遮直直向北約150公尺,臨學校圍牆,到岡山高中的校門口,我讀高中的時,這段路闊約十公尺,兩爿種鳳凰花樹,逐冬若到五~六月,花大開,蓊蓊的樹椏,密喌喌的綠色樹葉,著雜摻開滿紅phànn - phànn的鳳凰花,南風微微吹來,共這段細條路,粧thānn出萬般風情.
講著”岡山公園”,原本著有一片平坦草(操)場,阮讀”岡山高中”的時,”軍訓課”攏踮公園(校外操場)出操上課,遮日治時代,著有ㄧ片平坦空闊的運動埕,阮多桑讀田寮公學校的時陣,是學校的野球隊員,伊著捌(曾)來遮,參加”岡山郡”比賽,連紲三冬提(得)著頭賞(冠軍)的榮譽,當時的獎品,是原寸大小------野球銀棒一支------由“田寮公學校”永久收藏!
毋知當時?岡山公園重新造景美化,學校前這段路拓寬,鳳凰花樹失去影跡,毋過,當我 un- un – á 漫步,行過這節公園路,目珠稍可瞇一時仔,眼前彷彿浮顯出,蓊蓊的鳳凰樹跤,涼蔭有矮肥淡薄仔老態的Guī魏校長,坐著彼台公家配置,罩帆布的人力三輪車, uí 公園路彼頭,緩緩仔向學校這頭過來…….
一條”平和路” , uí舊驛頭,由東徂(tsoo)西,迵”公園路”,短短仔5~600公尺,青青子衿,高中三冬------大盤帽的歲月,就佇(tī/在)三輪車伕,隨著跤踏仔一輾(liàn)一輾(liàn),出力踏,無聲無說sueh,一點仔,一點仔,ZOOM-OUT(淡出)記持的長鏡頭,終其尾,消失甲無影無跡矣!......
姓 名: 吳 正 任
職 業: 國中台語文教師
沒有留言:
張貼留言