吳正任十外年來佇高雄誠濟國小、國中擔任台語文教師，用伊的教育熱情佮為台灣文化掖種、生湠的理念，奉獻予伊教的學生，伊講每一擺學期開始第一節課，攏會佇烏枋頂懸寫一句話：「語言是文化的土壤，母語是靈魂的故鄉。」用這句話來勉勵學生，可見伊傳授台語文，毋但是教囡仔學話，閣猶有傳承台灣文化的用心。伊惜花連枝，這款的精神，值得咱的敬疼。
我對吳正任有深刻的印象，毋是伊佇國中、國校教台語文，顛倒是因為捌讀過伊寫的台語散文。這是2012年的代誌，我佮黃恆秋、董恕明合編一本母語地誌散文集《鬥陣寫咱的土地》，讀著伊所寫的〈走揣惡地山河〉(收入《2009台語文學選》)，伊透過一張百外冬前出的古地圖，按圖揣路，寫出伊行踏夢中故鄉(大崗山地區)的經過。這篇散文文字清順，充滿感情，將伊沿路所看著的地景，對照地圖面定的地名，擱也引用早期文人所寫的古典詩來印證，通講是一篇難得的地誌佳作。特別予我感動的，是伊佇文章內底寫的這段話：
一張古地圖，美麗的山河，是我夢中的故鄉！遐的一切，不時佇我的頭殼內盤踅；對乳育我世世代代性命的母土，我永遠珍惜、感恩。畢竟，「家園」是咱性命的根源，毋管大抑細、闊抑挾，嘛毋管富裕抑散赤！
嘛因為按呢，吳正任用「走揣惡地山河」來做這本散文集的册名，確實有伊深沉的心意。這本冊分做兩輯，「散文輯」收二十五篇作品，攏將焦點囥佇地方文化、自然、人物佮田園頂懸，會用講是「地誌」的詩書寫。伊寫植物、寫海銀塗的傳奇、寫人物、寫布袋戲……，嘛寫〈番仔契〉(新港文書)、踏查伊能嘉矩《台灣踏查日記》的舊路──統合來看，這是台灣地誌書寫的範本，透過全面的調查、採訪，深入每一個所在，將地方的自然生態、歷史發展佮人文特色，用文學的筆寫出來，紀錄而且嘛展現地方文化的多樣性。我認為，這是吳正任這本散文集上有價值的所在。
收佇「附錄」有四篇，包括台語唸音、囡仔劇、華台平埔語的調查參雜記等，雖罔有較雜淡薄，毋過對這本散文集的正文嘛有補充、對照的作用。其中〈Mahanru‧部落‧Mahanru〉表面上是華台平埔語的調查筆記，卻是一篇誠讚的散文，無收入去「散文輯」，可能是因為使用華文寫的關係。
總是，我讀吳正任這本散文集，對伊用全心寫土地、用台文寫地誌的用心，會用講相當佩服。遮的散文攏毋是冊房內底的空思夢想，吳正任是一步一跤印，行踏故鄉的土地，走揣前人的跤跡，才會寫出遮呢好的作品出來。我真歡喜有機會代先讀著伊的作品，向望伊繼續寫落去，為台灣的地誌散文寫出開闊的新天地。
沒有留言:
張貼留言