弄蟬記

      

                                                                     吳正任

關係蟬仔,kah蟬仔聲ê記持,印象上深ê ,是十數年前,佇熱天欲hānn(伐)過徛秋ê坎站,駛車佮茨裡ê人,去308高地thi̍t -  thô ,彼ê所在,是位佇原高縣內門鄉,佮台南縣,龍崎佮南化遮三鄉êkap界;佇山頂三角點,有祀一塊地理界碑,徛踮遐,眺望四方,山脈一瓣一瓣,一崚一崚,攏是地質上所講的”惡地形”,無稍發草,毋過,佇欲跁上高地尾溜,細條山路,沿路兩爿,所看著ê,單向山坡,毋是竹抱仔,著是莿仔棘,抑是烏相思仔欉;山溝坎坪,除了摻一寡龍眼樹,檨仔欉掠外,著是”搓沫籽樹”,佮咱叫袂出名ê雜樹.

山頂有開幾仔間餐廳,菜式當然嘛是攏以山產為主,其中上引人注目ê是”蟬仔炒九層塔”;餐廳邊仔,有幾个上歲ê阿伯,坐踮樹跤納涼,山風微微,宓踮樹蔭歇睏,體感溫度確實會降低淡薄仔,為著欲瞭解,餐廳彼項野味------“蟬仔”欲uí佗來?我著依(uá)近遐聊天開講的歐吉桑,我佮in相借問了後,著向in問起------餐廳有一項野味,是欲按怎掠蟬仔咧?!其中一位阿伯著講:天欲暗進前,款一兩跤粉袋仔,閤紮一枝光(鏡)面較闊的”手電仔”,抑是頭殼額仔戴一具暗時拍獵用的”額頭用ê照燈”,抑若家己一个人無伴,會使呼khoo一隻土狗仔,鬥陣上山,到位了後,揣龍眼坪,檨仔坪,抑是樟腦樹林,踮一跡樹跤較平ê所在,然後,共大枝手電仔(抑拍獵用頭殼額頭前大燈)火拍光,向塗跤面tshiūnn,著會形成一跡圓閣闊的光圈仔,無偌久,抹踮樹椏頂ê肚蟬,抑大烏蟬,著”飛蛾撲火”仝款,一隻一隻,家己向光圈仔衝落來!按爾,掠蟬仔的人,著親像”桌頂ni/ liam柑”彼一樣,三兩下手,蟬仔著一搣一搣la̍k踮手婆裡, 毋免pok幾枝菸(香煙)ê時間,著掠欲有成十斤矣!

聽山裡阿伯講起著,暗暝上山掠蟬仔ê心適代,袂輸咧講一節囡仔古(童話故事),嘛親像是咧講一節魅惑ê”山中傳奇”!敢有影?遮呢爾輕可閣趣味,彼款刺激加淡薄仔”恐怖(探險)”,閣袂輸咧搬影戲仝款,窮實是生活佇都市ê大人囡仔,誠歹會當體會佮想像的.

關於蟬仔,kah蟬仔聲ê記持,最近這擺,假若是tsûn(前)年發生ê代誌,毌過,因為牽kha̍h著我ê無細膩,來發生一件關係一隻蟬仔(大烏(黑)蟬),佮名義上彼隻蟬仔ê擁有者,閣佮一位學生之間------三个人,佮一隻蟬仔”ê離奇故事;這層代誌,嘛予我留落誠深烙ê記持------對名義上,彼隻”蟬仔”ê擁有者,我有過講袂出ê歹勢,對彼隻”不告而別”ê“大烏蟬”,遐爾ne-tshénn(機警),假死,隨”趁勢飛走”逃生,若予彼隻蟬仔ê擁有者,誤會我朝故意”放生”,對我來講,窮實閣是ㄧtsân枉曲代……..

這層代誌,愛uí頭講起------彼當時,我佇ㄧ間山區小學服務,早起,第一節是秀子老師的課,課上完,我欲揣”教學日誌簿”簽名,無疑悟,佇講台邊,彼台教學電視的鐵材櫃下面層,除了囥粉筆箧仔以外,閣發現ㄧ隻大烏蟬,毌知是活ê,抑是死ê,橫直伊袂震袂動,對於細漢,滯佇山內貼底ê我來講,囡仔時代,用牛車油,黏樹椏頂ê蟬仔,這款齣頭,是無法度放袂記ê ,阆幾仔十冬以後,無張持,看著大烏蟬,內心ê歡喜是講袂出喙的! ㄧ時好玄, 問講:遮哪會走來ㄧ隻蟬仔?------有學生囝仔,隨應講:彼隻是阮老師掠(紮)來的!過無幾分鐘,秀子老師uí教室後尾門入來,我著開喙向秀子老師問講:蟬仔敢會使得借我hip幾張仔相?誠久毌捌看著這款肚蟬矣!秀子老師隨應講:好啊!無問題!

教學日誌簽好勢,我著共彼隻蟬仔囥踮我ê手蹄仔,閤hiuㄧ个學生,行出教室,來到運動場邊仔,ㄧ欉樹葉蓊蓊的菩提樹跤,即馬,換我欲麻煩這位學生,作我的模特兒,請伊比ㄧ个手勢,面帶笑容,倒手,手蹄仔掌心向頂懸展(thián )開,我共彼隻肚蟬,掠囥踮伊的手婆,閣比ㄧ个手勢,請學生用正手指指( kí -  tsáinn ),踮大烏蟬的kha–tsiah–phiann,輕輕仔lua̍h,這位學生,著照我的意思,目珠thí金,看蟬仔,指指輕輕仔uí蟬仔的頭部,lua̍h向翅股,閣lua̍h向尾椎,我徛踮伊邊仔,手機仔撥開,喬好角度,手指頭仔踮”相片”位置,揤(點)ㄧ下,hip第ㄧ張了,蟬仔,連動嘛袂震動,著佇學生注心看著蟬仔,指指輕輕仔,踮蟬仔的kha -  tsiah–phiann,lua̍h第二擺ê時, uí頭到尾,連動嘛攏袂震動ê大烏蟬,就佇阮無注意ê時,雄雄Tsi(吱)ㄧ聲,展(thián)開翅股,若像閃熠(sih-nah) ê光速彼ㄧ般,衝向天穹,消失佇阮ê目珠前……..

忖(tshún)良心講, 遮窮實是ㄧtsân意外,毌知我佮我ê學生佇sńg(耍/玩弄)蟬仔,抑是阮予彼隻大烏蟬戲弄去?!彼當陣,干那留落失神佮稀微ê我,有淡薄仔懊惱,ㄧ時煞gāng去,毌知欲按怎向秀子老師pué- huē(說明/辯解)……?!

職業: 國/中小台語文教師

E–mail  :tsingjim1127@yahoo.com.tw